Ribeira Sacra finaliza unha das mellores vendimas da súa historia
Eleva a colleita en Galicia a 76,8 millóns de quilos, un 9% máis que en 2022.
Por Europa Press / Redacción | SANTIAGO DE COMPOSTELA | 12/10/2023 | Actualizada ás 11:17
A Denominación de Orixe (DO) Ribeira Sacra finalizou na tarde do pasado mércores a súa vendima, "unha das máis longas da historia", cun total de 6,6 millóns de quilos de uva colleitados, o que supón ao redor de medio millón de quilos máis que en 2022 (+8%). Deste xeito, o global do recolleito en Galicia neste 2023 elévase a 76,8 millóns de quilos.
En declaracións a Europa Press, o presidente do Consello Regulador de Ribeira Sacra, Antonio Lombardía, destaca que na tarde do mércores terminou a colleita a última adega que quedaba pendente. Todo iso máis de 50 días despois de que comezase o 22 de agosto na DO unha "vendima moi longa".
O total recolleito supón a terceira maior colleita en Ribeira Sacra desde uns rexistros que datan de 1996, só superada por 2011 e 2019. A principal variedade recollida en tinto foi mencía, con 5,2 millóns de quilos. Na uva branca resaltan os 700.000 quilos de godello.
Lombardía subliña a "moi boa calidade" desta colleita, na que a uva tinta "vén con menos graos do habitual polo cambio climático". Relata que os viños deste exercicio son "máis lixeiros, máis frescos e máis froiteiros", de modo que se asemellan máis ao "estilo tradicional da zona".
DATOS GLOBAIS DE GALICIA
A pasada semana, a Xunta informaba os datos globais da vendima deste ano, por entón en 75,4 millóns de quilos a falta de pechar Ribeira Sacra. Agora, xa coas cifras desa DO, o global de Galicia elévase a 76,8 millóns de quilos, igualmente a maior colleita na última década e ao redor dun 9% máis que en 2022.
A DO Valdeorras tamén informaba o peche definitivo da vendima tras o fin dos traballos de Adegas Viña Somoza. Uns resultados que o presidente do consello regulador, José Ramón Rodríguez, cualifica como "magníficos", con preto de 8 millóns de quilos.
