Educadoras infantís en folga pola "precariedade" do sector: "Pouco cobramos para o que traballamos"
CC.OO. calcula o seguimento da folga nun 80%.
Por Europa Press / Redacción | VIGO | 19/10/2023 | Actualizada ás 15:03
Educadoras infantís denunciaron este xoves a "precariedade laboral" que vive na actualidade o sector e criticaron o "bloqueo" da negociación do novo convenio colectivo que acomete, ao seu xuízo, a patronal, tras dez meses de reunións.
Así o sinalaron durante a primeira das catro xornadas de folga que hai programadas no sector debido ás "lamentables condicións" que soportan estas traballadoras, "na súa gran maioría mulleres". Estes paros foron convocados por Comisións Obreiras (CC.OO.), uníndose en Galicia os sindicatos CIG e SNEP.
Con berros como 'Pouco cobramos para o que traballamos'; 'Convenio xusto, salario digno'; 'Sector feminizado, sector precarizado' ou 'A nosa vocación non paga facturas', decenas de educadoras infantís concentráronse este xoves na rúa Príncipe de Vigo e na Praza Pontevedra da Coruña para pedir "un salario acorde á formación e á responsabilidade que ostentan", a pesar da choiva que caía na cidade olívica nese momento.
Desde CC.OO., Tania Alonso lamentou a postura da patronal, que "bloquea" e mesmo "busca un retroceso" no novo convenio, que empeoraría as actuais condicións. Ela explicou que a maioría das traballadoras cobran o salario mínimo, cun traballo "precarizado", polo que pediu á sociedade que entenda as reivindicacións deste sector.
Ademais, ela criticou a posición dalgunhas empresas privadas, que estableceron servizos mínimos para a folga deste xoves, debido a que si estaba permitido para aquelas gardarías dependentes dos concellos, ao ser públicas ou semipúblicas. Segundo datos do sindicato, un 80% das traballadoras ás que si se lles permitiu facer folga, secundárona.
Pola súa banda, desde a CIG, Lucía Barros insistiu na necesidade dun salario "xusto" e acorde aos estudos e ao traballo que levan a acabo as educadoras infantís. Ela reivindicou o labor destas profesionais, que educan aos nenos máis pequenos: "non só coidan".
