O Sergas conta coas súas primeiras listas de contratación temporal de bibliotecarios e técnicos en documentación

O Servizo Galego de Saúde (Sergas) publicou o luns a relación definitiva e a puntuación de cada un dos admitidos nas que son as súas primeiras listas de contratación temporal das categorías de bibliotecario, con 85 aspirantes, por unha banda; e de técnico de grao medio en biblioteconomía e documentación, con 77, por outro.

As bibliotecas do Sergas están reguladas por unha orde do ano 2011 e desenvolven a función esencial de "difundir o coñecemento científico-técnico nas ciencias da saúde" e pór a disposición dos usuarios "información relevante e actualizada" para a toma de decisións na práctica clínica, a docencia, a investigación e a xestión.

A Consellería de Sanidade destaca que Galicia é "pioneira" na regulación destas categorías ao estar en tramitación administrativa o seu decreto de creación. Sen prexuízo desta próxima aprobación, o Sergas xa conta desde este martes con listas de contratación de ambos os grupos.

SILLEDA

Por outra banda, a directora xeral de Recursos Humanos do Sergas, Ana Comesaña Álvarez, presidiu este martes en Silleda unha reunión con representantes dos corpos de seguridade, de emerxencias e persoal da Fundación da Semana Verde para ultimar os operativos de organización e seguridade, dos exames da OPE que se desenvolverán os próximos 4 e 5 de novembro no Recinto Feiral de Silleda.

Durante o primeiro fin de semana do mes de novembro, explican nun comunicado, un total de 16.241 persoas aspirantes acudirán a realizar os exames para acceder ás 196 prazas da categoría de Persoal de Servizos Xerais (PSX); e ás 789 prazas de Técnico/a en Coidados Auxiliares de Enfermaría (TCAE).