Santiago non se pecha a outra solución para o parking do CHUS e pide á Xunta que facilite "a súa proposta"
A rexedora dixo que a situación de tráfico que se vive no CHUS é "absolutamente inhumana" e "insustentable no tempo".
Por Europa Press / Redacción | SANTIAGO DE COMPOSTELA | 30/10/2023 | Actualizada ás 13:06
A alcaldesa de Santiago, Goretti Sanmartín, defendeu este luns a proposta municipal para a construción dun novo aparcadoiro no Hospital Clínico, aínda que dixo que non se pecha a que haxa "outra solución", polo que instou á Xunta a "pór encima da mesa cal é a súa proposta".
A preguntas dos medios, a rexedora dixo que a situación de tráfico que se vive no CHUS é "absolutamente inhumana" e "insustentable no tempo" polo "caos de tráfico" que se xera no hospital, especialmente para aqueles pacientes que veñen de fóra da cidade. Fronte a isto, defendeu a cesión dunha parcela á Xunta para a construción dun aparcadoiro de 400 prazas, que "podería ser unha solución" aínda que "non completa" á situación.
"Pero non nos negamos a que haxa outra solución e a Xunta debería pór encima da mesa cal é a súa proposta", dixo Goretti Sanmartín, que reclamou que Santiago "non sexa discriminada" nesta cuestión con "respecto doutras cidades". En canto a investimento da Xunta, a alcaldesa de Santiago tamén esixiu un compromiso en materia de vivenda pública coa cidade, onde hai "máis de 800 persoas no rexistro de demandantes".
Así mesmo, ratificou que a intención do goberno local é "reactivar o parque comarcal de Bombeiros", algo para o que xa se mantiveron encontros e a rexedora ve "compromiso" tanto por parte da Xunta como da Deputación da Coruña. Ademais desta reactivación, confiou en que este paso poida supor un incremento de efectivos no parque comarcal.
