Un 71,3 % de participación nas oposicións a persoal de servizos xerais do Sergas

A fase de oposicións do proceso de acceso a persoal de servizos xerais (administrativos) do Servizo Galego de Saúde (Sergas) celebrouse este sábado no recinto feiral de Silleda cunha participación do 71,3 por cento. En concreto, acudiron aos exames un total de 4.779 persoas (de todas as quendas, incluíndo promoción interna e discapacidade) dos 6.700 que estaban convocados a estas oposicións para acceder a unha das 196 prazas ofertadas na categoría de PSX.

En paralelo, tamén este sábado celebráronse os exames da quenda de discapacidade para a categoría de técnico en coidados auxiliares de Enfermaría (TCAE), aos que acudiron 14 dos 15 aspirantes admitidos (93,3 por cento). As probas da quenda xeral serán este domingo, con máis de 9.500 convocados. Espérase que ao longo desta fin de semana máis de 16.200 opositores acudan ao recinto feiral de Silleda. A oferta total de prazas é de 196 en PSX e 789 en TCAE.

GARCÍA COMESAÑA VALORA A INTEGRACIÓN

O conselleiro de Sanidade, Julio García Comesaña, achegouse este sábado ata o lugar de realización das probas e reivindicou o traballo do Sergas a favor da integración de persoas con algún tipo de discapacidade. E é que esta fin de semana ofértanse un total de 80 vacantes para eles.

Así, valorou que, desde a primeira convocatoria do ano 2018, o servizo sanitario galego xa conta con máis dun centenar de traballadores con algunha discapacidade entre celadores, TCAE, piques e técnicos de Farmacia. García Comesaña agradeceu a súa "dedicación e labor diario", á vez que avogou por continuar con estes procesos selectivos que "aposten pola súa incorporación" a administración pública e, en particular, ao Sergas.

Oposicións a persoal de servizos xerais do Sergas, en Silleda, a 4 de novembro de 2023 | Fonte: XUNTA