Barcos galegos tamén matan centos de quenllas para vender as súas aletas
Un buque con bandeira portuguesa e base en Burela, Ártico, foi apañado en Vigo con 59 toneladas destas especies. Esta práctica, coñecida como finning, esquilma poboacións de escualos en todo o mundo.
Por Galicia Confidencial | Vigo | 22/06/2015 | Actualizada ás 08:00
Hai unhas semanas foron incautadas en Vigo 59 toneladas de quenllas coas aletas cortadas, práctica coñecida como finning. Viñan nun colector frigorífico e son propiedade do Ártico. O Ártico é un palangreiro, con bandeira portuguesa pero con base en Burela.
Este buque foi denunciado por Greenpeace por esquilmar caladoioro e tamen polos seus tripulantes por estar a traballar en condicións de escravitude. Criticaban que fosen tratados de maneira ilegal a bordo do barco.
O barco é propiedade de Pescarias Cayon & Garcia LDA, e pesca no outro lado do mundo en augas internacionais apenas na liña que separa o límite das 200 millas, a Zona Económica Exclusiva, de Nova Zelandia. Greenpeace denuncia que o palangre xera moitas capturas accidentais, entre elas quenlla, tartaruga e aves mariñas que se atopan ameazadas ou en perigo de extinción.
A pesca con palangre pode producir capturas accidentais, pero non é o caso do Ártico. O cargamento incautado en Vigo, levantou as sospeitas de que 59 toneladas de quenllas. "Non poden ser cousa do azar, senón que este barco pirata que di pescar atún, o que está a pescar é quenlla", sinalan desde Greenpeace. Das 190 toneladas de peixe, 59 toneladas eran as especies de quenllas, incluíndo 4.5 toneladas de aletas.
"O finning ou cortarlle a aleta ás quenllas e tirar o resto pola borda é unha práctica que está a levar a especies de quenllas en todo o mundo ao bordo da extinción", denuncian desde Greenpeace. A Unión Europea prohibiu esta práctica así como o mantemento a bordo, o transbordo e o desembarco de aletas de quenlla en barcos con bandeira Europea, sen importar en que parte do mundo pesquen. Ademais dez illas do Pacífico protexeron as súas augas, e prohibiron esta práctica ilegal.
"Está claro que este pesqueiro violou varias leis, de varios países", indica a organización ecoloxista."O Ártico é un deses barcos que non debería de seguir pescando", engade. Por iso, e en vista do ocorrido, engadirá este barco ás listas negras da pesca ilegal e reclamará á Comisión Europea que investigue estes accidentes.
