Asociacións ante a disminución do acollemento familiar en Galicia: "É unha moi mala noticia"

A Asociación Estatal de Acollemento Familiar (ASEAF), xunto coa asociación de familias de acollida de Galicia Acougo, urxiu á Xunta que saian en acollemento familiar "canto antes" os máis de 80 nenos menores de seis anos "que están a crecer en centros de protección, en contra do establecido pola Lei".

Segundo o último Boletín Datos Estatísticos de Medidas de Protección á Infancia e a Adolescencia, publicado hai unhas semanas polo Ministerio de Dereitos Sociais e Axenda 2030, con datos facilitados polo goberno galego, a 31 de decembro de 2022 en Galicia había un total de 1.767 nenos, nenas e adolescentes baixo a súa protección, dos cales 745 vivían en centros, un 20% menos que en 2021, e 1.022 facíano cunha familia de acollida, case un 3% menos que en 2021.

A diminución do acollemento familiar "é unha moi mala noticia para Galicia, tendo en conta ademais o alto número de nenos menores de 6 anos en centros", explican desde as asociacións. En particular, expresaron a súa preocupación porque entre 2021 e 2022 haxa "dous bebés máis, menores de 3 anos, crecendo nun centro".

Entre outros elementos, desde Acougo chaman a atención sobre a diminución nun 70 por cento dos nenos e adolescentes que saíron en 2022 en acollemento familiar desde os centros, de 152 en 2021 a só 46 en 2022, tendo en conta "o compromiso de desinstitucionalización que Galicia adquiriu en maio de 2022 para que en 2026 ningún neno ou nena menor de seis anos tutelado viva en centros de acollida residencial".

"É fundamental que unha comunidade como Galicia, comprometida coa infancia e a familia, deseñe e poña en marcha canto antes o seu propio Plan de Desinstitucionalización que lle permita cumprir co compromiso adquirido canto antes. As Asociacións de Familias de acollida pómonos a disposición da administración para contribuír ao impulso real do acollemento familiar nesta Comunidade." subliña Helena Escalada, presidenta de ASEAF.

Para favorecer o acollemento familiar, explican desde as asociacións "hai que facilitar maiores apoios ás familias, así como pór en marcha programas de acollemento de urxencia e temporal, sen esquecer a implementación canto antes de programas innovadores de familias colaboradoras, que acompañen aos nenos e nenas que viven nos centros, durante as vacacións ou os fins de semana".

Do mesmo xeito, instan á Xunta a "revisar as súas prácticas nos pasos de acollemento familiar a adopción", xa que o sistema actual "é moi ríxido" e "antepón os protocolos administrativos ás necesidades e interese superior do neno", ao non permitir que a familia de acollida poida pasar a ser adoptante, xa que se prioriza a aquelas persoas ou familias en lista de espera de adopción. Finalmente, afearon "falta de transparencia" en datos como o número de nenos, nenas e adolescentes con discapacidade no sistema de protección, así como sobre casos de sospeita de malos tratos infantís.

RESPOSTA DE POLÍTICA SOCIAL

A Consellería de Política Social asegurou que Galicia está "a fomentar con éxito" o acollemento familiar como forma prioritaria de protección dos menores e que a Comunidade supera en máis de seis puntos a media nacional neste ámbito. Así o apuntou a consellería en resposta ao comunicado das asociacións.

Segundo os datos de Política Social, en Galicia, case o 58 por cento dos nenos do sistema de protección viven en acollemento familiar, fronte ao 51,6 por cento da media de España. Con isto, Galicia supera en máis de seis puntos a media nacional de acollemento. Grazas a estes datos, "Galicia é actualmente a sexta comunidade autónoma con mellores datos de acollemento familiar" de toda España, engadiu a Xunta. Finalmente, Política Social puntualizou que, no último ano, Galicia reduciu un 26 por cento a cifra de nenos menores de seis anos que viven en centros de protección.