Por Europa Press / Redacción | SANTIAGO DE COMPOSTELA | 01/01/2024 | Actualizada ás 12:32
A Garda Civil localizou e detivo a un mozo de 19 anos acusado de atropelar mortalmente este luns, 1 de xaneiro, a un veciño do Pino (A Coruña) e, posteriormente, darse á fuga. Segundo informou a benemérita, trátase dun mozo de 19 anos veciño tamén do Pino e que deu positivo na proba de alcoholemia cando foi apresado. Está investigado por un delito de homicidio involuntario.
Un home de 67 anos faleceu na mañá deste luns, 1 de xaneiro, atropelado na localidade coruñesa do Pino por un vehículo que se deu á fuga. Segundo informaron desde o CIAE 112-Galicia, o suceso ocorreu sobre as 11,40 horas deste luns nunha pista local que une Ferreiro e Dodro, e que pasa baixo unha ponte da autovía A-54.
Un particular que presenciou os feitos chamou a emerxencias para pedir asistencia sanitaria e alertar de que un vehículo atropelara dúas persoas e continuara a marcha. Ata a zona foi mobilizado o helicóptero medicalizado do 061 con base en Santiago, así como unha ambulancia. Tamén foron alertados os Bombeiros de Arzúa e Santiago e a Garda Civil de Tráfico.
O home resultou falecido no punto, mentres que a muller, ferida leve, foi trasladada en ambulancia ao Hospital Clínico de Santiago. Na zona quedaron esparexidos algúns restos do coche que se deu á fuga.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.