Segundo día do ano: ventos de ata 136 quilómetros por hora en Muras

A borrasca que mantén en aviso laranxa por temporal a costa galega deixou fortes ventos no litoral e tamén no interior da comunidade, onde se rexistrou o refacho máximo das últimas horas con 136 km/h captados en Muras. Ao longo da madrugada e primeiras horas do segundo día do ano 2024, o vento pasou o limiar do 100 km/h en varios puntos da xeografía galega, segundo recollen os datos de Meteogalicia.

Ademais do pico máximo con 136 km/h de Muras, Cedeira rexistrou un refacho de 129 km/h ás 08.30 horas en Punta Candieira. Os 116,7 km/h en Lardeira (Carballeda de Valdeorras), os 119,9 kh/h de Abandín e o 109,9 km/h en Monfero foron outros dos puntos con ventos máis fortes das primeiras horas deste martes, no que permanecen activas varias alertas relacionadas co temporal. A borrasca deixou algunhas incidencias, fundamentalmente caídas de árbores en estradas secundarias e algún desprendemento de fachadas de edificios, aínda que ningunha de consideración, segundo trasladou o CIAE 112 Galicia.

ALERTA LARANXA

A Dirección Xeral de Emerxencias e Interior activou a alerta laranxa por temporal costeiro para este martes no litoral noroeste da provincia da Coruña. Segundo a Axencia Estatal de Meteoroloxía (AEMET), o fenómeno meteorolóxico adverso comezará de madrugada. Haberá ventos do suroeste de forza 8, de 62 a 74 km/h. A borrasca vai deixar tamén refachos de vento en nivel de alerta amarela no resto da costa de Galicia, de forza 7.

Por este motivo, e co fin de garantir a seguridade dos bens e as persoas, Emerxencias, a través do Centro Integrado de Atención ás Emerxencias 112 Galicia, informou da situación aos concellos das provincias afectadas; deputacións, servizos provinciais e agrupacións de voluntarios de Protección Civil e aos clubes náuticos, entre outros. No caso de concellos con plans de emerxencias municipais (PEMU), recomendase a súa activación en fase de preemerxencia.

A Xunta lembra a importancia de manterse afastado da liña de costa, isto é, diques, madrugadas e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.

ONDAS DE ATA CINCO METROS

E é que, tal e como advirte a AEMET, A Coruña estará en risco importante (laranxa) por ondada con ondas de ata cinco metros e en risco (amarelo) por vento, que tamén activará este mesmo aviso en Lugo. Ademais, esta provincia estará en alerta por ondas, do mesmo xeito que Pontevedra, onde as choivas tamén afectarán con aviso amarelo.

En xeral, prevese que unha fronte atlántica atravese a Península desde Galicia e deixe ceos nubrados ou cubertos estendéndose cara ao sueste e con precipitacións que afectarán a algo máis do terzo noroeste, menos probables canto máis ao sur e ao leste. Espérase que as precipitacións sexan abundantes no noroeste peninsular e oeste do sistema Central, mesmo localmente fortes ou persistentes no oeste de Galicia.