Por Ángela Precedo | SANTIAGO | 12/01/2024 | Actualizada ás 21:00
A marea de voluntarios chega de todos os lugares de España. Aos galegos véñense sumando estes días madrileños, castelanoleoneses, valencianos e moitos outros que queren botar unha man nun desastre que tamén sinten que lles afecta, pois son consumidores do noso marisco e moitos vacacionan nas nosas praias ou coñecen a nosa terra de estudos, traballo e viaxes. Mais hoxe na praia de Cabeiro, no concello do Porto do Son, unha estampa enchía os corazóns dos que paseaban pola zona: case medio cento de nenos afanábanse en recoller os pélets (microplásticos ou granulados) da area, con moito coidado de non pisar na liña das mareas para non soterralos e con ferramentas rudimentarias que se facían enormes nas súas manciñas. Tratábase dun grupo de estudantes de Secundaria do IES Porto do Son, que supervisado polos seus profesores e por unha ONG catalá especializada na limpeza de plásticos das praias, chegada de Barcelona, quixo sumarse ás labores de limpeza.
"Mirade, estes son os pélets, como vedes son moi pequeniños e tedes que ter moito coidado de non pisalos", explicáballes unha das voluntarias da organización, Elia Planas, que sostiña na súa man un destes plastiquiños a modo de exemplo. Tamén lles ía ensinando o material: cubos, tamices, bolsas de desfeito e mesmo pequenas palas. E, por suposto, repartíalles guantes. Os rapaces atopábanse moi sorprendidos do pequenos que eran os microplásticos, pois aseguraban que "nas fotos víanse máis grandes e máis xuntos". E é que neste areal as primeiras mareas do día deixaron os pélets moi dispersos, o que dificultaba as tarefas de recollida. Os grupos repartíronse ao longo de toda a praia e mentres uns collían entre as mans a area que máis cantidade de boliñas tiña, os outros afanábanse en tamizala para separar os pélets da area. "Recordade que o que é orgánico non se pode desbotar", advertía a profesora, que trataba de que as cousas se fixesen correctamente: "As algas deixámolas".
Elia explicounos a Galicia Confidencial que "somos unha ONG, Plastic Free Wave, e estivemos estes días limpando as praias de Lariño e Area Maior e organizamos varias actividades de voluntariado e tamén con escolas". "Como somos unha asociación que nos adicamos a isto da recollida de plásticos en Cataluña, viñemos aquí a axudar e ao final decidimos a praia de Cabeiro por proximidade á escola", cóntanos. Ao final, coa axuda e a boa disposición do profesorado, "son uns 40 nenos", o que "nos axudará moitísimo". E é que como ela mesma recoñece, os nenos ao ter mans pequenas poden ser unha grande axuda: "Ao final, canta máis precisión mellor e con nenos creo que nos irá ben, porque teñen mans máis pequeniñas". En Porto do Son é onde organizaron a primeira limpeza en colaboración con estudantes, pero a súa idea é "poder axudar e sumar a outros colexios á iniciativa" antes de voltar a Cataluña.
Ademais, unha das súas compañeiras na asociación cóntanos que o martes cando chegaron o tempo era moi malo, o que "facía moi díficil recoller os pélets". De feito, "tiñamos un tromel (un tamiz xiratorio como os que se empregaron durante a crise dos pélets de Sri Lanka) e a area ao estar mollada pola chuvia estaba tan prensada, cos pélets incrustados, que non nos serviu, non puidemos facer nada", conta. Por sorte o tempo foi mellorando e puideron nos seguintes días axudar algo máis co tromel, unha ferramenta que recomendan aos grupos de voluntarios que se están a organizar. Con todo, o seu temor, e ante o anuncio de que esta fin de semana chegarán o 90 % dos pélets, é a que "o temporal que está avisado volva facer imposibles as labores de limpeza". Pois xa non é resistir ao vento, á choiva e ao frío da praia, senón tratar de separar os pélets na area mollada, algo que vén "case imposible".
Por outra banda, dende a ONG Plastic Free Wave tamén queren facer un chamamento á cidadanía: "Hoxe son os pélets, pero hai moitos outros plásticos que están presentes nas nosas praias e residuos como restos de chapapote aos que se lles resta importancia". E recordan que entre praia e praia non só recollen microplásticos, senón tamén "todo tipo de plásticos de maior tamaño, restos de botellas, de cadeiras, hai de todo". Ademais, contan que "onte viñemos limpar e rematamos cheas de manchas negras pola roupa, mesmo chegamos a pensar que era o chapapote do Prestige, ata que nos contaron que hai aquí a unha millas da costa un gran corredor mariño de mercancías polo que pasan buques que todos os días teñen perdas, e esas perdas chegan ás praias". "É unha auténtica tolería, faiche perder a fe na humanidade", conclúen dende a asociación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.