O Entroido galego xa é Ben de Interese Cultural
O DOG publica a resolución que dá inicio ao procedemento de 24 meses para outorgarlle esta distinción
Por Europa Press / Redacción | SANTIAGO DE COMPOSTELA | 25/01/2024 | Actualizada ás 11:26
O Entroido ou Entroido galego conta desde este xoves coa protección de Ben de Interese Cultural (BIC), ao publicarse no Diario Oficial de Galicia (DOG) a resolución que inicia o procedemento para que sexa recoñecido como tal.
Esta celebración está xa protexida polo seu interese etnológico, a función social e a riqueza cultural e patrimonial que representa, así como a súa capacidade de xerar riqueza no ámbito local, fortalecer a convivencia e o entretemento, tal e como destaca a Xunta.
Coa publicación no DOG, iníciase un procedemento que durará un máximo de 24 meses para completar este expediente, pero a protección como BIC xa está en vigor desde este mesmo xoves.
A declaración realízase en sentido amplo para toda a celebración, non circunscrita só únaa serie de festexos, tendo en conta que 191 dos 313 concellos galegos --o 61 por cento-- escolle unha data vinculada ao Entroido como festivo local.
A resolución da Dirección Xeral consta de 16 páxinas e está acompañada de dous anexos. O primeiro explica a tradición do propio Entroido galego, a súa natureza e condición. De feito, menciona denominacións secundarias da celebración en función da zona: Antroido, Antroiro, Antroito, Antruido, Entroido, Entroiro, Entrudio, Entrudo, Entruido e Introido.
Tamén recolle o marco temporal no que se desenvolve, os días sinalados, as máscaras tradicionais e os 'mecos'. O segundo anexo dá a coñecer as medidas de protección que se lle dá ao Entroido como BIC. Así, a Consellería de Cultura sinala esta celebración como un "elemento central" no patrimonio inmaterial de todos os galegos, algo imprescindible para comprender e definir a identidade de Galicia.
Así, as medidas xerais de salvagarda comprometen ás administracións públicas a garantir a súa viabilidade, señaladamente a súa identificación, documentación, rexistro, investigación, preservación, protección, promoción, valorización, transmisión e revitalización.
