Galicia reduce ata o 8,8% o abandono escolar e adiántase sete anos ao obxectivo fixado pola UE para 2030

Galicia reduciu ata o 8,8% a taxa de abandono educativo temperán correspondente ao 2023 e adiántase sete anos ao cumprimento do obxectivo do 9% fixado pola Unión Europea para 2030. Así o confirmaron os datos do Instituto Galego de Estatística a falta de coñecer as cifras comparativas con España e co resto de comunidades autónomas.

Segundo informou a Xunta, desde o 2009 --no que se rexistrou un 25,8-- o abandono temperán, alumnado que decide non continuar cos seus estudos tras finalizar a etapa de Secundaria Obrigatoria, en Galicia reduciu 17 puntos.

A Consellería de Educación remarcou que os plans de reforzo académico, de atención á diversidade, de orientación e de impulso da FP Básica son "esenciais" neste resultado. Tamén, o Executivo autonómico agradeceu o labor do conxunto da comunidade educativa nese "bo resultado", especialmente no referente ao esforzo e implicación do profesorado e dos equipos directivos dos centros.

Un profesor dá clase a un grupo de alumnos o día que arrinca o curso escolar en Galicia, no CEIP Eduardo Cela Vila de Triacastela | Fonte: Carlos Castro - Arquivo