Os traballadores da lonxa de Cariño non teñen aseo sanitario nas instalacións, con pingueiras e fallos estruturais

O sindicato CIG asegurou este luns, nun comunicado, que as instalacións da lonxa de Cariño "están a sufrir unha alarmante deterioración xeral" e que nelas non se cumpre a normativa de prevención de riscos e saúde laboral para os traballadores. Así, aseguran que o persoal "carece de calquera tipo de aseo sanitario nas súas instalacións de traballo" e que o edifico ten "pingueiras e fallos estruturais", algo que motivou que "a entidade Portos de Galicia pechase as súas instalacións e trasladase ao seu persoal, deixando ao persoal da Xunta sen aseo e nunhas condicións sanitarias inadecuadas, inseguras e que incumpren a normativa básica". O sindicato denunciou esta situación ante a Inspección de Traballo que, afirman, "constatou a falta de calquera tipo de aseos" e "levará a cabo as actuacións pertinentes".

Lonxa de Cariño | Fonte: Páxinas galegas