18F.- Besteiro di que "Feijóo" está no "desconto" tras coñecerse as súas negociacións cos independentistas

O candidato do PSdeG á Presidencia da Xunta, José Ramón Gómez Besteiro, asegurou que o líder do Partido Popular, Alberto Núñez Feijóo, está no "desconto" tras coñecerse as súas negociacións cos independentistas cataláns. Besteiro pronunciouse deste xeito ao ser preguntado polas declaracións nas que a secretaria xeral de ERC, Marta Rovira, afirmou que o PP propuxo aos republicanos pactar no Congreso a investidura de Feijóo. Todo iso despois de que varios medios publicasen este sábado a última hora que Feijóo estaría aberto a un indulto a Puigdemont condicionado a que sexa xulgado e que rexeite a vía unilateral, e de que, instantes despois o PP matizase que, as súas condicións "non se deron cos indultos do procés".

Respecto diso, o dirixente socialista considerou que os votantes do PP "senten enganados" porque "durante tres meses estiveron a vivir unha crispación" por parte dun PP que ía "en contra de todo ese proceso de normalización que impulsou o Goberno de España para Cataluña e para España no seu conxunto". Besteiro sostivo que "outra vez a mentira do PP irrompe na campaña e reflicte o que é o PP e o que representou o PP nos últimos anos, tamén en Galicia" e que, segundo indicou, "é a mentira" e "a trama".

Por todo iso, dixo que esta forma de facer política de Feijóo "descualifícao" e sostivo que máis que un "pau", Feijóo xa está a vivir "tempos de desconto".

A SÚA POSTURA ANTE O DEBATE DE RTVE E AS ENQUISAS 

O aspirante socialista a liderar San Caetano asegurou que a ausencia do Partido Popular do debate que organiza RTVE para o mércores é o "reflexo" da súa falta de proxecto" para Galicia. En declaracións aos medios este martes no marco dunha visita ás instalacións dunha empresa no polígono de Santiago, Besteiro enmarcou esta ausencia dos conservadores nas "incomparecencias" do PP durante os últimos anos. "Estes 15 anos foron os 15 anos da apatía, do desinterese, da inacción e da falta de proxecto", apuntou.

Neste sentido, reprochou ao PP que "non da cara por Galicia" e sinalou que, fronte a iso, el ofrecerá aos galegos "unha forza política que quere cambiar Galicia". "Pero non só cambiar ao PP, senón transformar Galicia e apostar por unha Galicia mellor para os próximos anos", afirmou.

Ademais, preguntado polas enquisas, o candidato do PSdeG insistiu en que a "mellor enquisa" é a do próximo domingo, día 18 de febreiro, coa celebración das eleccións e reivindicou ao PSOE como o "cambio solvente". Na súa intervención, mostrouse convencido de que a cidadanía "se está sumando" ao proxecto "ilusionante e ambicioso" que representa o PSOE. "O que ofrecemos, ademais, é cambiar para gobernar", afirmou Besteiro, que trasladou aos cidadáns que, máis aló dun "simple cambio de partido", o seu partido representa un "cambio solvente, de futuro, para transformar Galicia e para aproveitar as inmensas oportunidades que ten o país".

Ademais, preguntado sobre se teme que o BNG roube votos de esquerda ao PSOE, Besteiro rexeitou utilizar o "termo temor". "Eu creo que nos temos que dirixir aos cidadáns, que son sabios", manifestou. Por último, considerou que nesta última semana "haberá sorpresas". "E eu creo que o PSOE vai ter un protagonismo que moita xente confía neste país espera e merece ademais", trasladou.

PROPOSTAS PARA EMPRESARIOS E SINDICATOS

Besteiro comprometeuse a promover un gran acordo de país con empresarios e sindicatos para lograr que os soldos medios en Galicia aumenten e se sitúen, como mínimo, na media salarial española, así como para reducir a xornada laboral dos empregados públicos a 35 horas. Segundo a última estatística do Instituto Nacional de Estatística (INE), o salario medio mensual do conxunto dos españois é de 2.118 euros fronte aos 2.056 que cobran as e os galegos tras 15 anos de gobernos do PP. Por iso, Besteiro prometeu avanzar no obxectivo da subida salarial media "porque é sinónimo de mellor economía, máis oportunidades e máis ambición de país".

O socialista defendeu que para os socialistas "un salario digno é un dereito básico" e puxo como exemplo a subida do salario mínimo interprofesional en case un 60% desde que Pedro Sánchez é presidente. Fronte a esta aposta, explicou que hai un PP que "prefire a precariedade dos traballadores e traballadoras e que mantén a Galicia no furgón de cola tamén en materia salarial". Ademais, destacou que co incremento do salario mínimo a 1.134 euros o Goberno de Pedro Sánchez volveu cumprir os seus compromisos coa cidadanía. "Porque gobernamos para as persoas e este modelo é o que imos trasladar a Galicia", manifestou para asegurar que desta subida benefícianse uns 100.000 galegos.

Besteiro dixo que "aumentar os soldos é a mellor ferramenta para combater a pobreza". "Os socialistas facemos política útil ao servizo dos cidadáns do noso país e, nesta liña, imos seguir durante o próximos catro anos na Xunta", engadiu.