Obxectivo de Galicia no sector lácteo: conseguir o 75 % do leite transformado para 2025

O presidente da Xunta en funcións, Alfonso Rueda, aposta pola industrialización do sector lácteo co obxectivo de conseguir o 75 % do leite transformado en Galicia para o ano 2025. "É un obxectivo ambicioso pero realista, xa que progresamos moito nos últimos anos", defende. Actualmente, Galicia industrializa ao redor do 63 % do seu leite, á vez que é a comunidade que produce o 42 % do leite de vaca de España.

Así o destacou nunha visita á queixería do Grupo Entrepinares, no municipio de Vilalba, onde estivo acompañado polo conselleiro de Medio Rural en funcións, José González. Rueda resalta a implicación con Galicia de industrias lácteas como a deste grupo e mostra "toda a disposición" do Goberno galego para seguir apoiando iniciativas que xeren riqueza.

A ampliación da planta de Entrepinares en Vilalba foi declarada como iniciativa empresarial prioritaria pola Xunta, unha actuación en marcha cun investimento de 19 millóns. Suporá a creación duns 40 empregos directos, que se suman aos preto de 300 que o grupo xa ten en Galicia.

AXUDAS DA PAC A ZONAS DE MONTAÑA

Noutra orde de cousas, o Diario Oficial de Galicia (DOG) publica este venres a disposición do Fondo Galego de Garantía Agraria (Fogga) pola que se notifican as resolucións de axudas de pago da Política Agraria Común (PAC) a zonas con limitacións naturais en áreas de montaña e en áreas distintas de montaña. Así, aprobáronse 18 millóns da campaña de 2023 para un total de 10.523 beneficiarios.

Estas axudas están cofinanciadas ao 75 % polo Fondo Europeo Agrícola de Desenvolvemento Rural (Feader). Do total, preto de 12 millóns corresponden aos pagos compensatorios en áreas de montaña e os case 6 millóns restantes a áreas distintas de montaña. Os interesados poden consultar a información na ligazón: https://fogga.xunta.gal/gl/pac/consultas_pac/beneficiario_de_axudas_pac/campana-2023.

Visita de Alfonso Rueda a Entrepinares, en Vilalba | Fonte: XUNTA