A neve, o xeo e a sarabia deixan accidentes e coches atrapados: saídas e vía, choques en cadea e cortes de tráfico

O temporal que afecta Galicia esta fin de semana deixou un total de 32 de incidencias nas estradas galegas, fundamentalmente pola presenza de xeo ou neve, aínda que a sarabia tamén provocou problemas como os dous accidentes rexistrados na mañá deste sábado en Pontevedra e Gondomar. Desas 32 incidencias, 21 producíronse dende as 8.00 horas deste sábado.

A central do 112 Galicia rexistrou un total de 32 incidencias relacionadas co xeo ou a neve nas últimas horas, nas que tamén xestionou varios sinistros viarios causados pola caída intensa de sarabia que afectou especialmente á provincia de Pontevedra. Na capital pontevedresa, ao redor das 06.16 horas, o condutor dun coche saíu ileso despois de perder o control do seu vehículo pola sarabia e acabar dando varias voltas de campá antes de impactar contra a mediana da autoestrada AP-9 ao seu paso por Salcedo.

A meteoroloxía tamén provocou problemas na PO-344 ao seu paso por Gondomar, onde varios vehículos sufriron saídas de vía a consecuencia dunha intensa granizada caída ao redor das 08.30 horas. Alí, polo menos dous coches acabaron accidentados sen que se producisen feridos, segundo traslada o 112. Aínda que o accidente máis relevante foi na AP-9, ao seu paso por Pontevedra con, polo menos, dúas persoas feridas tras unha colisión múltiple.

A estes sucesos sumáronse incidencias pola presenza de neve nas estradas dos concellos lugueses de Chantada, Folgoso do Courel e Triacastela. Pola súa banda, en Ourense víronse afectados os municipios de Montederramo, Nogueira de Ramuín, Chandrexa de Queixa, Avión, Calvos de Randín, Cualedro, Laza, Lobeira, Maceda, San Cristovo de Cea e A Gudiña. Na provincia de Pontevedra rexistráronse incidentes tamén en Forcarei, Rodeiro e Dozón.

RETENCIÓNS E ACCIDENTES NA A-52

Na A-52 ao seu paso pola Gudiña, diversos condutores informaron de importantes retencións debido ás nevadas e á presenza de xeo na calzada. Ata o punto desprazáronse a Garda Civil de Ourense e os servizos de mantemento da autovía, que traballan no punto con diferentes máquinas quitaneves.

Nesta mesma zona, un camioneiro contactou co 112 Galicia ao fío das 11.00 horas e indicou chocara contra outro camión no quilómetro 126 en sentido Ourense. Aínda que os vehículos non perderan a carga (lixo nun e pezas de vehículos no outro) quedaron atravesados na vía e interromperon a circulación. Con todo, a Garda Civil de Ourense confirmou que ningún dos condutores resultou ferido e o tráfico quedou restablecido.

Por outra banda, minutos despois das 8.30 horas, na A-52 ao seu paso pola Cañiza, un turismo sufriu un accidente por mor das precipitacións. Tamén na AP-9, ás 9.30 horas, produciuse unha saída de vía a causa da sarabia da que non houbo que lamentar feridos.

XEO E NEVE NA ESTRADA

Ademais destes incidentes causados pola sarabia na mañá do sábado, a central do 112 atendeu case unha ducia de alertas pola presenza de placas de xeo ou neve nas estradas das provincias da Coruña, Pontevedra e Lugo entre a medianoite e as 08.00 horas deste sábado. En Pontevedra, os problemas estiveron focalizados en estradas de Gondomar, A Cañiza e Pontevedra, así como en Pazos de Borbén e Rodeiro; mentres que en Lugo producíronse chamadas desde Ribeira de Piquín e Baleira e na provincia coruñesa, a neve causou problemas en Toques. A maioría das alertas xestionadas polo 112 foron de condutores que avisaban de que non podían continuar a súa marcha polas inclemencias meteorolóxicas, como ocorreu ás 04.30 horas na LU-751 en Ribeira de Piquín.

RESCATES EN MANZANEDA

Durante a noite, os servizos de emerxencia tiveron que realizar varios rescates de condutores atrapados pola neve na contorna da estación de esquí de Manzaneda. Minutos despois das 23.00 horas, unha condutora chamou ao 112 para pedir axuda ao ser incapaz de avanzar cando transitaba no seu coche pola OU-0704, na Pobra de Trives. Ata alí mobilizáronse para trasladar ás persoas ao seu destino equipos do GES de Castro Caldelas e a Agrupación de Voluntarios de Protección Civil da Pobra de Trives, que tiveron que levar a cabo tres rescates máis pola zona, como apunta o CIAE 112 Galicia.

CORTES DE ESTRADAS

Na provincia de Lugo, a neve cortou a circulación na A-6 desde o municipio lucense de Noceda ata Portela de Valcarce, en León, que xa foi restablecida. Segundo informou a Dirección Xeral de Tráfico (DGT), a circulación aínda está condicionada desde o quilómetro 438 en Noceda ata o 418 en Portela de Valcarce, en ambos os sentidos. Tamén, na mesma autovía, a DGT advertiu de que, desde o quilómetro 438 en Noceda ata o 475 en Veiga de Anzois, en ambos os sentidos, débese extremar a precaución.

Pola súa banda, na A-8 o vento provoca condicións difíciles para a circulación entre os quilómetros 536 en Veiga de San Tomé ao 552 en Someiro, en ambos os sentidos. En canto ás estradas secundarias, na LU-633 hai alerta por circulación irregular en Pedrafita-Alto Hospital, desde o quilómetro 0 en Pedrafita do Cebreiro ao quilómetro 20 en Queixadoiro. En Pedrafita a Garda Civil tivo que auxiliar a varios condutores e garantir a seguridade do tráfico.

Na provincia de Ourense a neve tamén está a afectar á circulación e na A-52 tamén se complica a circulación desde o quilómetro 112 na Canda ao 128 na Gudiña, en ambos os sentidos. Nesa autovía, no quilómetro 126 pasado o desvío da Mezquita, rexistrouse un accidente dun camión, do cal non houbo que lamentar feridos e o tráfico xa está restablecido. A Garda Civil de Ourense tivo que axudar a un grupo de 12 motoristas ao seu paso polas Estivadas.

A Garda Civil de Ourense informou de que na A-52, entre os quilómetros 170 ao 180 entre Cualedro e Tasmiras, atópanse traballando as máquinas para asegurar a circulación. Na OU-536 está prohibido o paso de autobuses, é obrigatorio o uso de cadeas ou os pneumáticos de inverno e tampouco poden circular os camións ou articulados. Esta restrición sitúase entre o quilómetro 24 en Barrio ao quilómetro 40 na Eirexa, en ambos os sentidos.

Na mesma estrada provincial, a DGT pide precaución á hora de circular entre o punto quilométrico 57 en Cima de Vila ao 63 no Reboledo. A nevada tamén afecta á OU-536 ao seu paso polo quilómetro 24 en Maceda ao 40 en Montederramo. Ata o lugar desprazáronse varias patrullas da Garda Civil ao haber camións retidos. Está prohibido o paso de camións e articulados pola OU-0704 entre o quilómetro 2 en Cova ao 6.8 na cabeza de Manzaneda, en sentido crecente da circulación. 

A DEPUTACIÓN DE LUGO DESPREGA 90 OPERARIOS E 28 QUITANEVES

A Deputación de Lugo mantén activo este sábado un dispositivo composto por 90 operarios e 28 quitaneves despregados por un centenar de estradas de 22 concellos de toda a provincia para velar pola seguridade as vías de comunicación ante o temporal de neve e xeo que azouta a comunidade galega.

O operativo está en funcioanamiento desde as 07.30 horas deste sábado, no que a cota de neve está en 400 metros e estanse dando xa espesores de ata 25 centímetros de neve acumulada en puntos da montaña de Lugo como o municipio de Cervantes, segundo sinala o goberno provincial nun comunicado. Así, traballadores e maquinaria actúan en 100 estradas das comarcas da Montaña, Terra Chá e A Mariña, onde a circulación é complicada pola neve, o xeo e a baixa visibilidade.

As estradas afectadas discorren polos concellos de Baleira, Becerreá, Folgoso do Courel, A Fonsagrada, Cervantes, O Incio, Navia de Suarna, Negueira de Muñiz, As Nogais, Pedrafita do Cebreiro, Quiroga, Ribas de Sil, Samos, Triacastela, Muras, Vilalba, Ourol, Taboada, A Pontenova, O Saviñao, Chantada e Baralla. Ademais dos 90 operarios e os 28 quitaneves, tamén están despregados polo territorio lugués tres tractores especiais con saleiro e cuña quitaneves, oito 'pickup' e doce todoterreos de apoio para facilitar o paso da maquinaria pesada.