A carreira 'Os 10.000 peregrinos' encherá de atletas as rúas de Compostela o próximo 6 de abril

A carreira 'Os 10.000 Peregrinos' encherá de atletas as rúas de Santiago de Compostela o próximo 6 de abril, xornada na que a cidade acollerá esta proba deportiva aberta a todos e todas e con distancias adaptadas ás capacidades de calquera corredor. Nesta ocasión, no evento, que foi presentado este martes na capital galega, os participantes poderán escoller entre os 10 quilómetros e os 5 quilómetros, mentres que os escolares poderán gozar dunha proba de 2 quilómetros. Ademais, as persoas que opten por non correr terán a opción de percorrer as rúas compostelás nunha camiñada.

A iniciativa, organizada pola Deputación da Coruña en colaboración coa Federación Galega de Atletismo e o Concello de Santiago foi presentada este martes polo titular da institución provincial, Valentín González Formoso; a segunda tenente de alcaldesa compostelá, Míriam Louzao, e o presidente da Federación, Iván Sanmartín, nun acto conducido polo xornalista Terio Carreira.

INSCRICIÓNS E PERCORRIDO

Os interesados poderán realizar as súas inscricións na web ata o 3 de abril. A carreira arrincará diante da Facultade do Medicina, percorrendo a Avenida Xoan XXIII, Burgo das Nacións, Avenida Castelao, Vista Alegre, Salvadas, Galeras, Pombal, Avenida Juan Carlos I, Montero Ríos, Praza de Galicia, penetrándose no centro histórico pola Senra, Toural e Rúa do Vilar, para terminar na Praza do Obradoiro.

Atletas de primeira liña como Carlos Mayo (marca España Media Maratón), Nico Cuesta, Ester Navarrete ou Alice Finot (quinta clasificada no Mundial) xa confirmaron a súa asistencia.

APOIO DA DEPUTACIÓN DA CORUÑA

Na presentación, Formoso puxo en valor o carácter "aberto" da carreira, xa que poden participar desde atletas de elite ata afeccionados, sen importar a súa idade nin condición física. Na primeira edición, o ano pasado, púidose ver a deportistas do nivel de Irene Sánchez-Escribano, Adrián Ben, Tariku Novales, Cristina Ruíz, Ester Navarrete, Daniel Arce ou Fernando Carro.

O presidente provincial afirmou tamén que 'Os 10.000 peregrinos' aspira a converterse nunha competición de referencia en Galicia e en España e servirá para "visualizar o esforzo por parte da Deputación na promoción do deporte, que se incrementa cada ano "financiando a máis de 800 entidades deportivas" en todas as disciplinas. 

"Cando as administracións traballamos nesa liña, o resultado é que cada vez aparecen máis deportivas de alto nivel e que serven de lebres para os que teñen ilusión de selo algún día", concluíu.