O programa Primavera Xove da Xunta ofrece preto de 600 prazas en albergues e campamentos xuvenís

A conselleira de Política Social e Xuventude en funcións, Fabiola García, visitou este sábado o albergue xuvenil das Sinas, en Vilanova de Arousa, unha das instalacións da Xunta que, no marco do programa Primavera Xove, ofrecen preto de 600 prazas en albergues e campamentos xuvenís.

Tal e como destacou a administración autonómica nunha nota de prensa, a través deste programa ofrécense estancias en albergues xuvenís durante os meses de marzo e abril a persoas con idades entre os 14 e os 30 anos. Trátase de preto de 600 prazas en seis instalacións da comunidade "para que a mocidade conte con alternativas de lecer educativo do seu interese e os pais teñan opcións de conciliación durante os fins de semana ou períodos non lectivos como a Semana Santa".

En concreto, nas Sinas, os participantes neste programa gozan de cinco días de aloxamento en réxime de pensión completa e de numerosas actividades acuáticas, de tiro con arco ou de talleres literarios. Ademais destas instalacións, outros espazos nos que se está levando a cabo Primavera Xove son os albergues xuvenís Mariña Española (Sada e Bergondo); Lug II (Lugo) e Area (Viveiro); así como os campamentos xuvenís A Devesa (Ribadeo) e Pontemaril (Forcarei).

Nenos nun campamento, a 13 de xuño de 2021, na Coruña, Galicia, (España). As últimas medidas da Xunta de Galicia permiten -aos campamentos de verán ter unha capacidade máxima de ata un 70 por cento da súa capacidade, sempre que se respecte a. César Arxina - Europa Press