Logra estafar máis de 2.000 euros a turistas que querían alugar unha vivenda vacacional nas Ons

Efectivos do posto da Garda Civil de Marín investigan a unha muller de 38 anos, veciña de Bueu, por un delito de estafa continuada relacionada co aluguer de vivendas turísticas na Illa de Ons. Tal e como detallou o Instituto Armado, desde principios deste mes de xullo xa se recolleron 10 denuncias interpostas por cidadáns que alugaran vivendas turísticas na illa. Os afectados abonaran os importes e cando ían acceder atopábanse con que xa estaban ocupadas por outras persoas.

Así, os axentes iniciaron unha investigación para tratar de esclarecer os feitos a través da cal lograron localizar en Huesca á presunta estafadora, que ten domicilio habitual en Bueu e conta con antecedentes policiais por feitos semellantes e que se fixo cunha contía que podería superar os 2.000 euros. A Garda Civil non descarta que haxa máis persoas prexudicadas, polo que recomenda que acudan a interpor as correspondentes denuncias. As dilixencias foron entregadas no xulgado de garda de Marín, onde se remitirán as posteriores denuncias que se recollan. Tamén está previsto que sexa alí onde compareza a investigada cando sexa requirida.

Axente da Garda Civil | Fonte: GARDA CIVIL