Dous terremotos rexistrados na provincia de Ourense durante a fin de semana

A provincia de Ourense foi escenario de dous terremotos, rexistrados o pasado fin de semana, con magnitudes de 1,7 e 1,8 segundo a escala de Richter, o que supón que son movementos sísmicos non perceptibles. Segundo os datos publicados polo Instituto Xeográfico Nacional (IGN), o primeiro sismo rexistrouse o sábado sobre as 20.00 horas, con epicentro no municipio de Xunqueira de Ambía, e en superficie. A magnitude do terremoto foi de 1,7.

Horas despois, na madrugada do domingo, rexistrábase outro terremoto, con epicentro no municipio de Padrenda e a 23 quilómetros de profundidade. A magnitude foi de 1,8. Este domingo tamén se rexistrou un movemento sísmico leve no Atlántico, fronte á Costa Ártabra, cunha magnitude de 2; mentres que o pasado venres ás 23.30 horas, houbo un movemento sísmico con epicentro no municipio pontevedrés de Mondariz, a unha profundidade de 17 quilómetros e de magnitude 2.