Os GES denuncian abandono institucional mentres Galicia arde: “Isto é un auténtico desastre”
Os GES acusan á Xunta de manter o servizo en precariedade, con motobombas avariadas, bases pechadas e persoal sen recoñecemento nin condicións dignas.
Por Galicia Confidencial | Santiago de Compostela | 28/08/2025 | Actualizada ás 22:27
A Asociación dos Grupos de Emerxencia Supramunicipais (GES) de Galicia fixo público un duro comunicado no que denuncia a situación de precariedade na que se atopa o servizo, mentres a vaga de lumes segue castigando o país. A entidade critica que, mentres a Xunta pide medios ao Goberno estatal, moitas das motobombas que deberían empregarse na loita contra os incendios utilízanse para tarefas municipais como o baldeo de rúas, como ocorreu en Cervo, ou permanecen avariadas e abandonadas en almacéns e garaxes. “É incrible o que sucedeu: en A Gudiña hai dous camións parados, un deles desde hai dous anos”, lamentan.
Os GES lembran que foron creados en 2013 como servizo esencial para incendios forestais e urbanos no rural galego, con cobertura en toda a comunidade, pero seguen sen ser recoñecidos como bombeiros pola Administración. Isto tradúcese, segundo denuncian, en condicións laborais indignas: soldos próximos ao SMI, falta de equipos de protección adecuados, ausencia de recoñecemento de enfermidades profesionais ou de coeficientes que permitan adiantar a idade de xubilación. Ademais, critican que cando reclaman os seus dereitos sofren despidos ou reubicacións decididas polos alcaldes de turno.
Ante esta situación, a asociación insta ao presidente da Xunta, Alfonso Rueda, a reabrir as bases pechadas en lugares como A Fonsagrada, Becerreá, Valga, Guitiriz ou Cervo, que deixaron amplas zonas rurais sen cobertura. “Que máis ten que suceder? Cando vai ser o momento?”, pregúntanse os profesionais, lembrando as palabras recentes de ministras como Sara Aagesen ou Yolanda Díaz, que reclamaron dignificar o labor dos equipos de extinción e garantir que “non haxa bombeiros de primeira e de segunda”.
