Un home acusado de tentar asasinar á súa muller en Santiago alega que a apuñalou sen intención de matala

Un home acusado de tentativa de asasinato á súa parella, ameazas, violencia de xénero e lesións, ocasionadas tamén ao seu fillo, recoñeceu apuñalar á muller pero non de forma planificada nin coa intención de matar. Así mesmo, manifestou non querer ferir o neno. Fíxoo durante o xuízo celebrado este xoves na sección primeira da Audiencia Provincial da Coruña. Fiscalía e acusación particular solicitan para el penas que suman 21 anos e seis meses de prisión.

Durante a vista, a vítima reiterou que "tiña medo" do procesado, do cal apuntou que é celoso. "Cando el tomaba si lle tiña medo porque era outra persoa, púñase pesado, un pouco peleón", detallou. A muller explicou tamén que nalgunha ocasión recibiu ameazas por parte da súa parella. "Dicíame que eu acabara coa súa vida e que el ía acabar coa miña", manifestou. Respecto ao día dos feitos, a muller relatou que o procesado a atacou "polos dous lados" e que a segunda puñalada ía dirixida "ao corazón".

"Meteuse no baño, sacou a navalla do peto e empezou a atacarme, atrancoume entre a parede e o lavabo", relatou. Tras o sucedido, sinalou estar a tratamento psicolóxico por trastorno de ansiedade e de tensión postraumática. "Sentíame nerviosa, non podía durmir e tíñalle medo a todo", destacou. Un fillo do acusado, pola súa banda, manifestou non presenciar pelexas nin discusións antes da agresión e explicou que o día dos feitos sacou ao seu pai do cuarto de baño sen que ofrecese resistencia. "Agarreino e saqueino para abaixo, non se resistiu nada", manifestou.

FEITOS

O home, segundo recolle o escrito de cualificación fiscal, mantivo desde o ano 2014 unha relación sentimental coa vítima, coa que tivo dous fillos e coa que se trasladou a España en xaneiro de 2022. En febreiro regresou ao seu país aínda que o día antes de facelo, no domicilio familiar situado en Santiago de Compostela, "con ánimo de atentar contra a integridade física da súa muller, propinoulle un bofetón provocando que caese ao chan", estando, ademais, os fillos, menores de idade, no domicilio.

Fiscalía sinala que, con posterioridade a esa data, "de forma constante e persistente, comunicábase telefonicamente coa vítima enviándolle mensaxes, con ánimo de atemorizala e inquietala". Ademais, "ante a idea de que refixese a súa vida" ameazouna con matala. En abril de 2022, cando regresou a España, quedou no domicilio dun familiar pero en maio acudiu a ver aos seus fillos. O día dos feitos "con ánimo de atentar contra a súa vida, de forma sorpresiva e inesperada, pois levaba á súa filla en brazos, tras pousala no chan" dirixiuse cara á vítima, que se atopaba no baño limpando, "esgrimindo unha navalla de 24 centímetros de lonxitude e 13,5 de folla de dobre fío".

Despois, relata o fiscal, "abalanzouse" sobre a muller "cravándolla en reiteradas ocasións na zona do peito". A vítima tratou de agarrar a navalla durante uns feitos presenciados polos dous fillos menores. Nun momento dado, interveu o de seis anos que tratou de evitar que continuase a agresión e auxiliar á súa nai "póndose no medio e tratando de arrebatar a navalla ao seu pai , recibindo "cortes na man dereita por parte do seu proxenitor, á vez que gritaba 'papá por favor non mates a mamá'". A muller, engade Fiscalía, "non tivo oportunidade de defenderse, non só polo inesperado da acometida senón por non poder saír do baño dado o reducido do espazo".