Por Europa Press / Redacción | SANTIAGO | 10/04/2024 | Actualizada ás 13:05
O compromiso de ampliar a rebaixa fiscal para a tributación en herdanzas entre parentes que ata agora non gozaban deste beneficio ou de impulsar a gratuidade das primeiras matrículas universitarias foron dous dos fitos no ámbito dos compromisos electorais que marcaron a campaña do PP galego, con Alfonso Rueda como candidato, á cita coas urnas do pasado 18 de febreiro.
Este martes, xa como candidato formal á Presidencia da Xunta, proposto polo xefe do Lexislativo, Miguel Ángel Santalices, despois de lograr consolidar a maioría absoluta o pasado 18F, Rueda reconverteu as súas promesas electorais en compromisos asumidos en sede parlamentaria. Por áreas, estes son algúns dos principais anuncios:
POLÍTICA FISCAL
- Rueda avanzou que "nas próximas semanas" aprobarase a nova rebaixa fiscal para a tributación de herdanzas entre os denominados parentes 'colaterais': irmáns, tíos, sobriños, sogros, cuñados e xenros.
- Medidas para autónomos. Nesta lexislatura simplificaranse "e unificarán" as convocatorias de axudas destinadas a este colectivo. Ademais, lembrou que neste 2024 os galegos que se dean de alta como autónomos non deberán pagar nin un só euro de cota porque a asume "ao 100 %" a Xunta. Á convocatoria, aberta desde principios de ano, presentáronse xa máis de 5.000 emprendedores galegos.
EDUCACIÓN
- Compromiso de facer o ensino superior "cen por cen gratuíto" ao facilitar que as primeiras matrículas sexan gratis para os alumnos que "aproben a curso por ano".
- Aposta pola FP e reforzo con dous plans: FPGal350, dirixido a alcanzar o "abandono escolar cero"; e Conecta FP, centrado nas competencias dixitais.
- Ademais, Rueda prometeu pór a disposición dos fogares galegos unha medida "pioneira": axuda para que os nenos e nenas vaian a actividades extraescolares ou clases de reforzo.
VIVENDA
- Na liña cunha área de goberno que tamén prevé "reforzar" a vivenda, reiterou os compromisos para desenvolver solo residencial para 20.000 vivendas protexidas, das cales 2.000 serán de aluguer accesible; rebaixar ata o 3 % o imposto de transmisións patrimoniais para a compra de vivenda por parte das familias monoparentais; e "duplicar" o tamaño do parque público de vivenda: dos 3.800 domicilios de hoxe a 8.000 en 2028.
- As primeiras 375 destas novas vivendas de promoción pública, ratificou Rueda, empezaranse a construír nos cen primeiros días do novo Goberno.
SANIDADE
- A Xunta seguirá explorando nesta lexislatura fórmulas para favorecer ás persoas que queren ter fillos con medidas como a posibilidade de conxelar óvulos na sanidade pública e a ampliación a 45 anos no acceso á fecundación in vitro, eliminando o límite dun fillo para o acceso a esta fórmula.
- O Servizo Galego de Saúde (Sergas) habilitará psicólogos clínicos nos centros de saúde co obxectivo de apoiar ás persoas que necesitan reducir, na medida do posible, o consumo de psicofármacos.
- Ademais, Rueda fixo outros anuncios en materia de sanidade e asegurou que se permitirá elaborar en Galicia os chamados CART-T. "Os fármacos máis avanzados para a loita contra o cancro empezarán en moi pouco tempo a producirse e administrarse aquí, en Galicia", destacou e tamén reiterou o compromiso cos cribados.
ATENCIÓN AOS MAIORES
- Rueda reiterou o seu compromiso cos maiores e confirmou que a Xunta tratará de pór en marcha outro mil novas prazas, tanto de residencia como en centros de día. Así mesmo, dixo que a Xunta continuará co despregamento do bono universal de 5.000 euros para os galegos dependentes que prefiren permanecer na súa casa poidan ter axuda dun coidador.
- Tamén ratificou que esta lexislatura se porá en marcha a axuda, similar á do 'Bono Deporte' para nenos, para maiores que practican actividade física.
BENESTAR ANIMAL
- Concluíu que Galicia avanzará a próxima década "desde o respecto e o bo trato aos animais de compañía": coa gratuidade dos primeiros gastos veterinarios ás persoas que adopten, o impulso dun novo centro de acollida a nivel galego e apoiando aos concellos de máis de 20.000 habitantes para que instalen parques de lecer canino.
CULTURA?
- Non houbo ningún anuncio en relación á cultura: nin ao mundo da literatura, do audiovisual, do teatro, da pintura...
Ver esta publicación en Instagram
¿Gústache esta noticia?Problemas cos comentarios?
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.
¿Gústache esta noticia?
- O Goberno lembra que a Xunta lle pediu intervir Alcoa mediante a SEPI
- Gamallo inicia unha rolda polas agrupacións de cooperación transfronteirizas coa AETC Río Miño
- O AVE Vigo-O Porto segue a ser fonte de conflitos: o PP de Vigo pedirá un pleno extraordinario tras o rexeitamento do PSOE
- La Región terá que pagar 100.000 euros á Deputación de Ourense
- Sánchez obtería o mellor resultado dos últimos 5 anos para o PSOE tras o seu anuncio, segundo o CIS
- Rueda renova toda a cúpula do Sergas ademais doutros 12 altos cargos