Por GC Emprende | Compostela | 05/10/2015 | Actualizada ás 09:00
O Portal de Innovación Innovamás presentou o primeiro Anuario da Innovación en Galicia 2015 co obxectivo de concienciar aos empresarios e directivos sobre a importancia de apostar pola innovación, así como dar a coñecer os proxectos innovadores galegos tanto dentro como fóra da Comunidade.
O Anuario da Innovación en Galicia 2015, que nace co obxectivo de divulgar a I+D+i entre o empresariado e dar a coñecer as innovacións que se realizan en Galicia, ofrece unha completa radiografía do ecosistema galego de I+D+i, a través de reportaxes, entrevistas e artigos de opinión, nos que os protagonistas son os centros de investigación, empresas, institucións e outros organismos públicos e privados, que están a facer de Galicia unha rexión con voz propia en talento e innovación.
O Anuario conta ademais cun apartado específico dedicado á promoción de innovacións "made in Galicia", onde se recolle unha selección de produtos innovadores realizados por compañías galegas de diferentes sectores que, grazas á súa aposta pola I+D+i, conseguiron situarse no mercado e alcanzar o éxito empresarial.
Tal e como explica a súa directora, Tesa Díaz-Faes, "desde o ano 2009 apostamos en MundiNova por divulgar a innovación". "En Galicia innóvase, pero estas innovacións e o potencial innovador das empresas e centros de investigación galegos teñen que ser cada vez máis coñecidos entre o tecido empresarial e a sociedade. Se aos directivos facilítanselles ferramentas para saber como empezar a innovar, que fan outras empresas e quen lles pode axudar, estaremos a cumprir o noso obxectivo para conseguir que moitas empresas galegas cambien aos poucos a súa mentalidade e láncense a definir e pór en marcha proxectos innovadores, mellorando así a súa competitividade", engadiu.
A publicación finaliza cun amplo directorio no que referencian os principais axentes vinculados á innovación en Galicia, desde institucións públicas e organismos oficiais, até centros de investigación, centros tecnolóxicos, puntos en Galicia da Rede PI+D+i do CDTI, aceleradoras de empresas ou parques tecnolóxicos, entre outros.
Pódese acceder ao anuario en www.revistadeinnovacion.com/publicaciones/anuario_de_la_innovacion_2015.pdf
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.