O Sergas chama a doar sangue, especialmente dos grupos A+, 0+, 0- e B+
Estima que se precisan case 500 doazóns diarias.
Por Europa Press / Redacción | SANTIAGO DE COMPOSTELA | 12/04/2024 | Actualizada ás 19:18
A Axencia de Doazón de Órganos e Sangue (ADOS) do Sergas fixo un chamamento á poboación a que acuda a doar sangue, especialmente dos grupos A positivo, 0 positivo, 0 negativo e B positivo, xa que se atopan en nivel baixo. Ademais, os grupos A negativo e B negativo atópanse en niveis normais, mentres que AB positivo e AB negativo nun nivel bo.
ADOS advertiu de que nos hospitais hai moitas persoas que precisan dunha transfusión por motivos variados. Así, para poder atendelos, estima que se precisan case 500 doazóns diarias.
Neste contexto, fai un chamamento á poboación para que se achegue ás unidades móbiles que diariamente percorren as catro provincias galegas, así como a algún dos sete puntos permanentes situados nas cidades.
