Máis dunha quincena de manifestacións convocadas pola CIG o 1 de maio, Día do Traballador
A mobilización central será na Coruña contra "o roubo e saqueo", nun contexto no que un terzo dos asalariados non chega ao salario mínimo.
Por Europa Press / Redacción | SANTIAGO | 22/04/2024 | Actualizada ás 14:03
A CIG chama a unha "gran mobilización" con motivo do 1 de maio, Día Internacional dos Traballadores, para demandar "traballo digno", nun ano no que tamén terá importancia o "non á guerra" ao aproveitar esta manifestación para defender a "soberanía dos pobos contra o imperialismo". O sindicato nacionalista mobilizarase nunha quincena de municipios, aínda que a protesta central será na Coruña, onde tamén se celebrará de forma paralela a manifestación convocada por UGT e CC.OO.
En rolda de prensa, o secretario xeral da CIG, Paulo Carril, denunciou o aumento da precariedade laboral e da poboación de risco de exclusión. Advirte de que o contrato que máis crece desde 2021, ano da aprobación da última reforma laboral, é o fixo descontinuo (+ 125 %). Ademais, alerta dun aumento da parcialidade, onde o 75,5 % das persoas con xornadas parciais son mulleres, de forma que "a tan cacareada finalización da temporalidade leva a que o 42,50 % dos contratos duran menos dunha semana en 2023".
O 33,6 % dos asalariados galegos non alcanzaron ingresos equivalentes ao salario mínimo e o 59,3 % con ingresos do traballo non alcanza os ingresos medios en Galicia. "Todo isto é o resultado da aplicación dunha política laboral do Goberno español e do diálogo social que está a encamiñar á imposición de novos recortes", reproba Carril, onde inclúe a privatización da sanidade pública. Por iso, a CIG pide protestar contra o "roubo e saqueo".
CONTRA O "XENOCIDIO DO POBO PALESTINO"
Paralelamente, a CIG mobilízase tamén en contra do aumento do belicismo de "obediencia" á OTAN que está "a axitar de maneira grave o mundo", baseado no imperialismo de Estados Unidos de "lume, sangue e morte". Así, Carril carga contra a "crueldade" de Occidente ao apoiar o "xenocidio contra o pobo palestino". Igualmente, rexeita o último anuncio do Goberno central de incremento das partidas para armamento.
MANIFESTACIÓNS
En concreto, as mobilizacións sairán ás 12.00 horas, salvo tres: Ourense, desde Praza Maior (11.30 horas); Pontevedra, desde Praza da Ferrería (11.30 horas); Cangas, Praza do Concello (18.00 horas). O resto de protestas comezarán ao mediodía do 1 de maio: A Coruña, desde Praza de Vigo; Cee, Praza de Otero Lastres Santiago; Santiago, Praza Roxa; Ribeira, Praza do Peixe; Ferrol, local sindical (Esteiro); As Pontes, Praza do Carmen; Lugo, edificio sindical; Ribadeo, edificio sindical; Verín, Praza do Concello; Vilagarcía, Casa do Mar; A Estrada, Praza do Mercado; Vigo, A Drobada.
A preguntas da prensa, Carril dixo que esperan que haxa unha "resposta importante" na rúa, á vez que expuxo que a CIG é o sindicato con maior representación en Galicia, o que contrapón coa "imaxe que está en retroceso" dos sindicatos UGT e CC.OO. Subliña que Galicia está na cabeza con País Vasco en xornadas de folga no último ano, polo que o "descrédito e falta de credibilidade que poidan ter" outras centrais "non arrastra" a sindicatos como a CIG.
