Por Manuel Vilas | A Coruña | 23/11/2015 | Actualizada ás 14:00
Un grupo de asalariados do Diario de Arousa informan que “Editorial La Capital procedeu hai uns días ao despedimento de dous traballadores dos departamentos de Administración e Fotografía”. Unha medida que reduce aínda máis a capacidade dun cadro de persoal que ven de soportar dous EREs consecutivos, coa súa correspondente perda de paro.
O grupo chegou a ter case 150 empregados. Agora, segundo fontes da dirección consultadas por GC, anda aproximadamente nos 116.
Os sucesivos EREs e despedimentos producíronse nun grupo con importantes débedas. Agora mesmo os traballadores -segundo recoñece a propia empresa- teñen sen cobrar dúas mensualidades.
En conversación con Galicia Confidencial (GC), a dirección promete que os atrasos se solventarán a partir de febreiro, cando din finaliza o pagamento das indemnizacións e outros gastos derivados da restructuración actual, e que non haberá máis despedimentos en Diario de Arousa e outras cabeceiras.
Unha promesa que non convence a todos os traballadores. O Diario de Arousa xa votou ir a folga unha folga indefinida a partir do xoves 26 de novembro. As outras cabeceiras (El Ideal, DxT, Diario de Ferrol e Diario de Bergantiños) votarán esta semana. Na Coruña a asemblea será esta tarde. Non é a primeira vez que os traballadores de Editorial La Capital van a folga, secundada masivamente noutras ocasións, aínda que as veces a dirección logrou sacar edicións reducidas.
Para fontes do Diario de Arousa, os novos despedimentos indican que as intencións de Editorial La Capital son as de desmantelar Diario de Arousa e deixar ás comarcas de O Salnés, O Barbanza e Ulla-Umia sen unha cabeceira propia. “O que sería un ataque directo á pluralidade informativa e tería pésimas consecuencias non só para os traballos deste medio, senón para o conxunto da sociedade e dos seus representantes, que verían como se apaga a súa voz”, engaden.
Nun comunicado público piden o apoio da sociedade arousá para que acuda á concentración que vai ter lugar o venres 27 ás 20:30 na Praza de Galicia de Vilagarcía.
Consultada por GC a dirección do grupo editorial sobre as mobilizacións e os despedimentos, a empresa admite que “sempre son duros os despedimentos e especialmente elixir de quen prescindir” e recoñece o “dereito absoluto” dos traballadores a mobilizarse. Con todo, lánzase unha mensaxe de optimismo sobre a complicada situación financeira do grupo, arguméntase que os despedimentos eran necesarios para lograr o equilibrio de gastos e ingresos e sobre todo reitérase a promesa, comunicada ao cadro de persoal, de que non haberá novas baixas.
A situación de La Capital é delicada dende hai moito tempo. O Grupo que controla o empresario arxentino-galego Florencio Aldrey rematou 2013 admitindo nas súas unhas débedas de 302.000 euros cos seus asalariados e 816.000 cos seus provedores. Daquela ás administracións públicas debíalles a finais de ano máis de 535.000 euros, incluídos 210.000 á Seguridade Social. Así é todo, está manténdose a frote, entre outros factores, grazas ao sacrificio do seu cadro de persoal ao financiamento dos seus acredores bancarios e societarios, como Abanca e Comar.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.