O BNG critica duramente as enquisas e debates por “españolizar” a campaña
Nun comunicado interno insta a súa militancia a intensificar os seus esforzos para convencer aos galegos para superar a “ocultación mediática”. Presenta un recurso perante o plano de cobertura da TVG e Radio Galega desta campaña electoral.
Por Galicia Confidencial | Compostela | 14/12/2015 | Actualizada ás 19:25
Varias enquisas electorais apuntan a que Nós-Candidatura Galega, a lista electoral impulsada polo BNG, non obterá representación nos comicios do 20D. Un feito co que non coincide a Executiva nacionalista que nun comunicado critica duramente estes traballos demoscópicos e denuncia a "españolización" da campaña.
Así, denuncia que as enquisas “perderon de xeito definitivo a súa finalidade de reflectir o estado de opinión” porque, di esta formación, “substituíron a súa función pola de inducir un determinado estado de opinión”. “Especialmente grave no caso das gobernamentais -CIS, polo seu carácter público- que no caso da Galiza resulta claramente cuestionábel: pregúntase por unha alternativa aínda non conformada cando foi realizada a mostra, como Nós-Candidatura Galega, que obtén (segundo ese pintoresco criterio demoscópico seguido) menor apoio que a opción de voto ao BNG nesa mesma enquisa”, indica.
“Non podemos albiscar o resultado electoral, mais si afirmar con rotundidade que a mostra non se fundamenta en parámetros cientificamente aceptábeis, e si nunha evidente intencionalidade política”, indica este comunicado interno remitido a todos os militantes.
Un comunicado no que tamén se cuestionan os debate televisivos e se critica que se queira “españolizar” a campaña cun “novo tetrapartidismo” entre PP, PSOE, C's e Podemos. O vello esquema aínda máis reforzado: España, centro de información e aparente debate; Galiza, inexistente”. “En definitiva, a consideración da política como espectáculo mediático, substituíndo o contraste de ideas en pé de igualdade pola aparición dos líderes españois en platós antes reservados aos reality shows e ao resto de telelixo”, engade.
Así, critica que se “anule e oculte” a presenza mediática da alternativa nacionalista que representa Nós-Candidatura Galega. Neste sentido, lembra que esta lista xa presentou un recurso perante o plano de cobertura da TVG e Radio Galega desta campaña electoral por suspender conexións en directo ou eliminar debates en cada unha das circunscricións. “Co fin de españolizar aínda en maior medida a campaña e residualizar do punto de vista informativo a Nós-Candidatura Galega, malia á súa condición -en virtude da representación parlamentar do BNG- de forza representativa”, engade.
Por iso, insta a súa militancia e simpatizantes “encarecidamente a saír á rúa, a intensificar o labor de contacto social directo, persoal, e a “popularizar colectivamente” a alternativa de Nós-Candidatura Galega. “O único xeito de superarmos a ocultación mediática é a través da visualización social e de rúa, do noso traballo. Fagámolo co orgullo de sermos a alternativa 100% galega”, engade o comunicado que lembra que “cada voto conta”.
“Está en xogo a existencia política e visíbel da Galiza como nación e con representación xenuína, non submisa a ninguén. O resultado, máis que nunca, estará en función do noso traballo e da nosa determinación, individual e colectiva”, recolle a misiva.
