Por GC Emprende | Vigo | 17/12/2015 | Actualizada ás 11:30
Proxecto PINAET (Polo de Innovación Aeroespacial Transfronteirizo). Ese é o nome da iniciativa conxunta entre Galicia e o Norte de Portugal para mellorar a excelencia científica e o desenvolvemento de I+D+i no eido espacial a través da colaboración interrexional transfronteiriza con axentes empresariais.
Baseándose na posta en marcha do Centro de Innovación Aeroespacial de Galicia como un novo polo estratéxico de excelencia científica e industrial no sector aeroespacial, darase soporte e servizo a entidades relacionadas con este sector mellorando a competitividade rexional e promovendo a creación e consolidación de empresas e empregos cualificados. O proxecto PINAET encádrase dentro da convocatoria Interreg do programa de Cooperación Transfronteiriza España - Portugal (POCTEP).
O principal papel do Centro de Innovación será potenciar a colaboración público-privada grazas á que moitas empresas provenientes doutros sectores afíns poderán participar e colaborar na fabricación de produtos con tecnoloxía de vangarda dos que se obterán elevadas marxes de beneficio.
Esta semana xa se constituíu formalmente o padroado da Fundación Centro de Innovación Aeroespacial de Galicia. Así, nomeáronse ao Reitor da Universidade de Vigo, Salustiano Mato, como presidente, á Delegada do Consorcio da Zona Franca, Teresa Pedrosa, como vicepresidente e ao director xeral de Delta Vigo, Francisco Puga, como secretario.
Esta fundación está constituída polo Consorcio da Zona Franca e a Universidade de Vigo como patróns fundadores de carácter público e como patróns fundadores de carácter privado por Airbus; o Consorcio Aeronáutico Galego (CAG); Delta Vigo e a Unión de Empresas Galegas de Aeronáutica (UDEGA). O obxecto da Fundación é pór en marcha e xestionar dito Centro para que será o principal foco de innovación e desenvolvemento de todo o noroeste peninsular para este novo sector. O Centro de Innovación terá a súa sede no edificio tecnolóxico de Porto do Molle e contará con instalacións técnicas que estarán ao nivel das utilizadas pola European Space Agency (ESA).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.