Ciudadanos di que será a “voz galega” en Madrid
Os seus dirixentes din que teñen “boas expectativas” para as eleccións galegas do 2016 porque este 20D “certifica a súa implantación” en Galicia.
Por Galicia Confidencial | Compostela | 21/12/2015 | Actualizada ás 00:45
Un escano e o 9% dos votos. Son os resultados de Ciudadanos en Galicia. Uns resultados modestos en comparación ao 14% que sacou esta formación no conxunto do Estado. Sen embargo, os seus responsables en Galicia, amosáronse “moi satisfeitos” e anunciaron xa que os case 150.00 votos obtidos “certifican a súa implantación” en Galicia.
De feito, esta formación xa olla para as autonómicas do ano que ven e os seus responsables en Galicia aseguran que estarán “presentes”. Así, suliñaron que os resultados do 20D sinalan que multiplicaron por cinco" o número de votantes en Galicia con respecto ás locais.
Este domingo, pouco despois da comparecencia do seu líder, Albert Rivera, tamén compareceron en Santiago o delegado de Ciudadanos en Galicia, Javier Chouza, á coordinadora do partido en Santiago, Lola Pazos, e o recentemente elixido deputado do Congreso pola Coruña, Antonio Rodríguez.
“Haberá unha voz galega en Madrid, a de Antonio Rodríguez”, dixo Javier Chouza que insistiu en que esta formación "está a crecer" en Galicia con "paso firme". "Estes resultados certifican a implantación de Cidadáns en Galicia e anúnciannos moi boas expectativas para as autonómicas", engadiu Lola Pazos, que agradeceu o labor de todos os afiliados e simpatizantes nunha campaña "moi dura".
