Aumentan nun 14% os despedidos por ERE o pasado ano

A Xunta e o seu presidente, Alberto Núñez Feijóo, teñen dito en varias ocasións que o 2015 foi o ano do inicio da recuperación económica. Unha suposta recuperación económica que, sen embargo, non se albisca nos datos do paro, que sigue aumentando, nin tampouco nos dos ERE.

E é que en Galicia aumentou un 14 % o número de persoas despedidas por Expedientes de Regulación de Emprego o pasado ano. Un modelo que se utiliza, segundo CC.OO., como un "instrumento de axuste de persoal puro e duro". Por este procedemento perderon o emprego un total de 858 traballadores, un cento máis que no ano anterior, cando foran despedidas deste xeito 754 persoas.

Segundo a Secretaría de Emprego de CCOO de Galicia, entre xaneiro e decembro de 2015 comunicáronse á autoridade laboral galega 371 expedientes de regulación de emprego (ERE) que afectaron a 5.494 persoas. O número de traballadoresatinxidas por ERE baixa un 46,71 % con respecto ao mesmo período do ano anterior.

Nos doce meses de 2015 suspendéuselles a relación laboral ao 70,37 % das persoas afectadas por ERE. Os datos revelan que o ERE de extinción está gañando peso: no ano 2014 abrangue o 6,41% do total de persoas afectadas e no ano 2015 a porcentaxe sobe ata o 13,69%."«De aplicar o ERE como unha medida para adecuar o persoal a unha situación conxuntural, pasouse a utilizalo como instrumento de axuste de persoal puro e duro", sinala Maica Bouza, secretaria de Emprego de CCOO. A sindicalista apoia as súas afirmacións no dato da baixada dos ERE e das persoas afectadas por eles, ao tempo que medra o número de persoas despedidas.

A industria xunta o maior número de traballadores afectados, con 3.176 ata decembro de 2015 (o 50,68% do total). Cabe destacar que, aínda que baixou o número de persoas afectadas por ERE, no sector da pesca na provincia da Coruña aumentaron nun 230,22% debido ao conflito do sector, que amarrou os seus barcos durante tres meses.