A UPG gaña unha Asemblea á que acudiron o 35% dos que votaron en Amio
Cumpriuse o guión previsto. A candidata da liña oficialista do BNG, Ana Pontón, é xa a primeira muller que chega a voceira nacional. Aymerich anuncia a súa marcha. Vídeo das resolucións e do discurso final no interior.
- Aymerich abandona o BNG tras gañaren as teses da UPG
- Carlos Aymerich: “O ciclo político do BNG expirou e terá unha vida vexetativa, nas deputacións e na CIG”
Por Galicia Confidencial | A Coruña | 28/02/2016 | Actualizada ás 22:08
Ana Belén Pontón Mondelo, actual voceira parlamentar, levará o leme dun Bloque que promete refundarse. Con todo, os plans electorais seguen a ser o mesmos. A diversidade ideolóxica e o volume da militancia da fronte, pola contra, é sensiblemente menor.
Pontón gañou grazas, entre outros factores, ao pacto entre a Unión do Pobo Galego -partido no que milita- e o Movemento Galego ao Socialismo -partido tamén comunista cuxos dirixentes proceden en boa medida da UPG.
No Palexco da Coruña 1.191 persoas votaron á candidatura de Ana Pontón. 170 votos foron para a de Carlos B. Ansoar, un militante do Barbanza que foi o único dos críticos en dar a cara nas urnas. Houbo 131 brancos e 25 nulos.
Son en total 1.517 sufraxios, 2.866 menos (un 65% inferior) que os contados na Asemblea de hai catro anos en Amio. Daquela Carlos Aymerich e Francisco Jorquera se repartiron case en parte iguais 4.383 sufraxios para ver quen era o candidato á Xunta. Tras Amio, o Bloque sufriu dúas escisións importantes e unha progresiva sangría de votos e militantes. No referido a militantes, polo visto e oído este domingo, a sangría pode prolongarse.
Nas votacións previas ao documento político, a liña oficialista tamén gañou, pero houbo varios votos particulares que rozaron os 500 apoios.
Unha mostra que non todos no Bloque están cómodos coa receita de actualizar o discurso e a organización sen introducir cambios profundos. Nin se abre a porta aos pactos coas mareas nin se obriga a disolver os partidos e correntes que conviven na fronte.
Estas eran dúas das demandas de Abrente, a corrente máis socialdemócrata entre os nacionalistas. O seu líder Carlos Aymerich confirmou na propia Asemblea que marcha da fronte, canso de pertencer a unha organización na que non se ve representado. Está por ver cantos das persoas próximas a Abrente tamén collen a porta. Outros críticos, como Carme Adán ou Alba Nogueira comprometeron seguir na fronte.
A chegada de Pontón ao liderado é moi significativa. Por vez primeira o principal partido da historia do nacionalismo, a UPG, non cede o cargo de voceiro nacional. É máis, pesos pesados desta forza -como Néstor Rego, Bieito Lobeira, Montse Prado, Goretti San Martín ou Rubén Cela- están na Executivo.
Na lista ao Consello Nacional non hai rastro de membros de Abrente nin sequera de independentes como o até hoxe voceiro nacional, Xavier Vence, ou da deputada Carme Adán, quen públicamente pediron un cambio de rumbo ante o contínuo devalo nas urnas.
“Un revés electoral non esgota un proxecto político!” proclamou Pontón no seu discurso de investidura. Na Asemblea non se abordou quen será o cabeza de cartel nas vindeiras eleccións a Xunta.
O BNG aprobou numerosas resolucións, entre outras: a prol da independencia de Cataluña, contra a prórroga de ENCE, en solidariedade co pobo kurdo, co pobo palestino e pola liberdade de Arnaldo Otegui “inxustamente encarcelado pola súa defensa dos dereitos nacionais de Euskal Herri “ por vías pacíficas e democráticas. Velaquí o discurso completo da nova portavoz do Bloque Nacionalista Galego:
