Por Europa Press / Redacción | Santiago de Compostela | 07/01/2025 | Actualizada ás 17:34
Un total de catro persoas perderon a vida en accidentes de tráfico ocorridos en vías interurbanas galegas durante a Operación Especial de Nadal que a Dirección Xeral de Tráfico (DGT) puxo en marcha ás 15:00 horas do pasado 20 de decembro de 2024 e que se prolongou ata a medianoite deste luns 6 de xaneiro de 2025, o que supón oito menos que en 2023.
Desta maneira, supón unha diminución do 67% respecto de 2023 e iguálase o número de mortos nas estradas de Galicia do Nadal de 2021/2022, mentres que en 2019/2020 foron seis, nove en 2022/2023 e 12 en 2023/2024. Por provincias, A Coruña rexistrou tres falecidos e Pontevedra, un.
A nivel estatal, 51 persoas perderon a vida en 48 accidentes mortais de tráfico ocorridos en vías interurbanas en Nadal, o que supón un falecido máis que o ano anterior, cando perderon a vida 50 persoas en 43 sinistros mortais.
Durante estes días rexistráronse na estrada 20,8 millóns de desprazamentos de longo percorrido o que supón un aumento do 8% con respecto ás festas do Nadal de 2023, segundo informou a DGT, que precisa que a duración das operacións especiais de tráfico de Nadal non sempre comprende o mesmo período de tempo, polo que, comparativamente falando, o Nadal de 2019-2020 é a única que coincide en días.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.