Máis de 120.000 galegos emigraron ao estranxeiro dende 2009 e xa superan o medio millón
Malia que a Xunta insiste na recuperación económica o certo é que cada vez hai máis galegos que marchan do país. En 2015 o número de residentes galegos no exterior creceu en 10.000 persoas.
Por Galicia Confidencial | Santiago | 17/03/2016 | Actualizada ás 15:03
A sangría da emigración non cesa. Malia que Goberno central e Xunta seguen presumindo dunha suposta recuperación económica, o certo é que Galicia e España seguen perdendo poboación. Por primeira vez, o número de galegos no estranxeiro superou a barreira do medio millón. En concreto, a 1 de xaneiro de 2016 había 503.840 galegos no exterior, segundo os datos do Instituto Nacional de Estadística (INE).
No útltimo ano, a emigración galega creceu un 1,99%, pasando de 493.970 persoas hai un ano aos actuais 503.840, é dicir, 9.870 máis emigrantes. Do total actual, 106.182 están en Europa, o 21%.
Os datos son máis alarmantes se se miran con perspectiva histórica, xa que a comunidade galega no exterior disparouse nos últimos anos. Así, dende 2009 aumentou en 120.241 persoas de Galicia no estranxeiro, é dicir, en 2016 se rexistrou un 31,34 por cento máis de emigrantes que hai sete anos.
Por provincias, os coruñeses son os que máis emigran, seguidos de pontevedreses, ourensáns e lugueses.
A emigración galega no exterior representa o 21,85% do total da española, que ascende a 2.305.030 persoas.
| 2009 | 2010 | 2011 | 2012 | 2013 | 2014 | 2015 | 2016 | |
|---|---|---|---|---|---|---|---|---|
| A CORUÑA | 135.377 | 141.626 | 149.072 | 155.808 | 161.436 | 166.623 | 171.501 | 174.984 |
| LUGO | 48.540 | 51.718 | 56.442 | 60.450 | 63.361 | 66.088 | 68.666 | 70.274 |
| OURENSE | 85.302 | 89.459 | 95.139 | 99.548 | 103.389 | 106.702 | 109.779 | 111.647 |
| PONTEVEDRA | 114.380 | 118.265 | 124.563 | 130.006 | 135.626 | 140.145 | 144.024 | 146.935 |
Fonte: INE.
