A perspectiva de xénero xoga un papel determinante no diagnóstico precoz de patoloxías", di o conselleiro de Sanidade

O conselleiro de Sanidade, Antonio Gómez Caamaño, destacou este xoves a aposta da Xunta pola inclusión da perspectiva de xénero na asistencia sanitaria e asegurou que o seu departamento traballa en novas medidas centradas na atención e na saúde da muller, pondo o foco na atención primaria.

Así o trasladou o titular de Sanidade no acto de inauguración da Xornada Muller Hoxe, organizada pola Xunta en colaboración con Organon, compañía que ten como obxectivo axudar a mellorar a saúde integral das mulleres. Alí, segundo informou a Consellería nunha nota de prensa, Gómez Caamaño subliñou que a perspectiva de xénero xoga un papel determinante no diagnóstico e no tratamento precoz dalgunhas patoloxías e, en consecuencia, resulta fundamental incorporar este enfoque nas políticas sanitarias.

Nesta liña, o conselleiro remarcou que o seu departamento ten moi presente este enfoque, pondo como exemplo a Estratexia Galega de Saúde 2030, documento que introduce unha visión integral da saúde da muller e incorpora a perspectiva de xénero nas doenzas nas que existen diferenzas segundo o sexo.

CIG

Por outra banda, CIG-Saúde reclamou un reforzo de persoal de enfermaría e de servizos xerais nos centros de saúde ante a campaña de vacinación. Sobre a mesma, subliña que tanto a da gripe como a do covid realizarase nos centros de saúde "e non nos grandes centros de vacinación".

Tamén afirma que non tiveron inicialmente coñecemento diso a través da dirección de enfermaría ou xerencias ata que foron, posteriormente, informados. A CIG alude, con todo, a unha situación de sobrecarga tanto para persoal de enfermaría como de servizos e demanda un reforzo para afrontar a campaña de vacinación.