Sumar reclama á Xunta e ao Estado actuacións urxentes pola vertedura da antiga fábrica de Hadas

O concelleiro de Nós Pobra, Xosé Lois Piñeiro, instou este venres á Xunta de Galicia e ao Goberno central a intervir "de maneira urxente" para poñer fin á situación de contaminación ambiental derivada da antiga fábrica de Hadas, situada na Pobra do Caramiñal. A advertencia realizouse durante unha visita aos terreos da Ribeiriña, promovida por Sumar Galicia, formación que anunciou que levará o caso ao Congreso mediante preguntas parlamentarias.

O representante local alertou da preocupación crecente da veciñanza polo estado actual da nave, que permanece en pé, e polos residuos e verteduras derivadas de antigos depósitos de fuel non eliminados adecuadamente tras o peche da factoría. Segundo o Goberno municipal, estes elementos representan un perigo tanto para a saúde pública como para o ecosistema e o prestixio da ría, recoñecida como zona produtora.

Durante a visita, os representantes de Sumar Galicia —entre eles o deputado coruñés Manuel Lago, a secretaria de organización Gloria Alonso e o secretario xeral do partido, Paulo Carlos López— mostraron o seu respaldo ás demandas da corporación local. Comprometéronse a elevar o caso a nivel estatal e solicitar unha reunión co Ministerio competente, na que tamén participarán concelleiras de Nós Pobra.

"Imos poñer toda a nosa capacidade para estar ao lado da veciñanza e presionar para que se resolva este problema ambiental", declarou Lago. Pola súa banda, Paulo Carlos López apelou ao diálogo entre administracións e expresou o seu desexo de que "a Xunta asuma a responsabilidade", aínda que apuntou que "en mans do Partido Popular, as competencias moitas veces se converten en incompetencias".