O 15 de maio, clave para o futuro da confluencia galega
A coordinadora de En Marea anuncia unha asemblea aberta para fixar a estratexia cara as eleccións españolas e galegas. Polo de agora, os socios manteñen posturas diferentes sobre a forma que debe adoptar a coalición.
Por Galicia Confidencial | Santiago | 30/04/2016 | Actualizada ás 15:47
A inminente convocatoria de eleccións xerais precipita os acontecementos na coalición En Marea. Un dos socios, ANOVA Irmandade Nacionalista, anunciou que “haberá asemblea xeral aberta de En Marea o 15 de maio para camiñar cara ás eleccións ás cortes e ao Parlamento Galego”.
O anuncio prodúcese despois dunha longa reunión este venres entre responsábeis de ANOVA, Esquerda Unida, Podemos Galicia e algunhas mareas municipalistas.
Todos coinciden na necesidade de reeditar a coalición e ampliala polas bases con tempo, para evitar os apuros e improvisacións do 20D. Agora ben, subsisten as diferencias sobre cal é a mellor forma de artellar a coalición.
O grupo xa iniciou a inscrición de En Marea como partido diante do Ministerio do Interior, que polo de agora non finalizou a tramitación do expediente. Con todo, esta solución (a de crear un partido aínda que sexa co alcume de “instrumental”) non é compartida por todos.
Un dos factores a ter en conta son as negociacións entre Podemos e Izquierda Unida. Os dous actores déronse un prazo dunha semana para pechar un acordo, que consideran está encamiñado. Un pacto a nivel estatal obrigaría a que Esquerda Unida e Podemos Galicia buscaran outro acordo ad hoc no país para incluír nesa confluencia a outros actores, especialmente a ANOVA.
O partido de Xosé Manuel Beiras e a marea de Santiago (Compostela Aberta, liderada polo dirixente de ANOVA Martiño Noriega) son os defensores máis decididos da postura do partido instrumental. Xosé Manuel Beiras -líder de ANOVA- argumenta que así a Mesa do Congreso non podería volver a negar o grupo parlamentar propio a En Marea, como sucedeu tras o 20D.
Os que argumentan en contra do partido instrumental advirten que o regulamento do Congreso tamén especifica que non poderá haber deputados dun mesmo partido en dous grupos parlamentares. Un requirimento que, por outra parte, a propia mesa do Congreso violou varias veces no pasado sen ser corrixida polo Tribunal Constitucional.
Seguindo esta liña de razoamento, sería imprescindíbel que a Mesa do Congreso fose proclive a conceder o grupo parlamentar á confluencia aínda que haxa deputados militantes de Podemos e Esquerda Unida e a existencia dun partido propio non resultaría, polo contrario, fundamental. Algúns grupos de Podemos, como o de Santiago, xa expresaron as súas dúbidas sobre é compatíbel a militancia en Podemos coa militancia noutra formación oficialmente inscrita no Registro de Partidos do Estado.
A esta lea burocrática hai que engadir a postura das Mareas en Común, dispostas a institucionalizar o seu proceso de confluencia, bautizado Marea Viva, incluso como partido político propio, novo instrumento que logo podería ser empregado no diálogo con outras forzas.
En definitiva, a Asemblea do 15 de maio antóllase clave para lograr que a confluencia galega chegue cos deberes feitos as próximas eleccións e non suceda como nas pasadas, cando se presentou sen primarias e cun programa electoral que non viu a luz até unha vez comezada a campaña.
