Estas son as novidades do Plan de Prevención de Incendios de Galicia para 2025
Nova figura de xefe loxístico, unha ferramenta para lumes transfronteirizos e máis formación, entre as principais medidas. Haberá 7.000 profesionais dispoñibles no alto risco de incendio, 30 medios aéreos e 380 motobombas.
Por Europa Press / Redacción | SANTIAGO DE COMPOSTELA | 05/05/2025 | Actualizada ás 14:33
O Consello da Xunta aprobou este luns o plan de prevención de incendios (Pladiga) para a campaña de 2025 con novidades como: a creación da figura dun xefe de loxística en grandes incendios, o desenvolvemento dunha ferramenta de lumes transfronteirizos de Portugal e un aumento de recursos para formación.
Así o destacou o presidente da Xunta, Alfonso Rueda, na súa comparecencia tras a reunión do Consello, onde informou de que a nova figura de xefe de loxística actuará en lumes dunha "certa complexidade" por "volume ou pola súa evolución", o cal se encargará de facilitar o desprazamento de medios durante a extinción, velar polo funcionamento das comunicacións e garantir que se dispón do material necesario para as tarefas.
Ademais, haberá un incremento do 20 % na partida destinada a formación e adestramento do persoal, con 1,8 millóns de euros para dous anos. Haberá 3.500 accións formativas, cursos monográficos --sobre cuestións como novas formas de incendios, técnicas de extinción e ferramentas-- e acreditación de niveis. A iso súmase unha aposta pola "sensibilización" da cidadanía.
Tamén se desenvolverá unha ferramenta que "permita coñecer os riscos" do lume transfronteirizo, no marco dunha colaboración con Portugal, que centrará nas provincias Pontevedra e Ourense. Pola súa banda, Rueda cifra nos habituais 7.000 profesionais dispoñibles entre as diferentes administracións para o alto risco. Haberá unha trintena de medio aéreos e 380 motobombas. O presidente valorou como unha "boa noticia" a redución a 26 das parroquias de alto risco de incendios, 14 menos que as 40 de 2024, ademais de destacar plans preventivos para o seis parques naturais galegos.
OBXECTIVOS
Tal e como recollía Europa Press a pasada semana, o Pladiga márcase o obxectivo de que ardan menos de 18.554,5 hectáreas en 2025, a media do queimado na última década --15.106 hectáreas se se quitan os valores extremos destes 10 anos--. Ademais, increméntase a rede de videovixilancia a 181 cámaras, catro máis, en 90 localizacións, con dous sitios novos (nas Pontes e Mondariz).
Este plan ten obxectivos como unha redución dos 307 incendios de media na última década (lumes de máis de 0,5 hectáreas). En liña con anos anteriores, os lumes superiores a 25 hectáreas deberanse manter por baixo do 2 % do total e prevese que os dunha hectárea ou menos supoñan máis do 70 %. No tocante ás situacións 2, aquelas en as que o lume ameaza casas, quérese baixar das sete activacións medias do último lustro --houbo só una en 2024--. As hectáreas queimadas en 2024 foron 2.644,7 --con mínimo histórico de 755 lumes--, unhas 4.000 hectáreas menos que as 6.749 de 2023, cifra que só foi menor en 2018 (2.600). Sobresaen neste dez anos o arrasado nas ondas de 2017 (62.096) e 2022 (51.643).
Así mesmo, o Pladiga marca obxectivos específicos para este ano como: unha revisión dos plans municipais de prevención de incendios pendentes de aprobación, desenvolver convenios para a constitución de brigadas de prevención en mancomunidades de municipios durante seis meses ao ano, avanzar no anteproxecto da lei pendente de loita integral contra incendios e comprar seis máquinas hidrostáticas polivalentes que poden facer tanto rozas como extinción. O persoal laboral fixo descontinuo de prevención de incendios pasa a traballar oito meses ao ano este 2025 e aumentará a nove meses en 2026.
Mentres, as parroquias de alto risco de incendios baixan a 26 este ano, o que supón 14 menos que as 40 de 2024. Por provincias a repartición é o seguinte: encabeza Ourense con 17, seguida de Pontevedra (5) e A Coruña (4). Non hai ningunha en Lugo ao saír a que había en Folgoso. As parroquias de alto risco de incendio (PAAI) son aquelas que acumulan unha media anual de sete lumes ou máis no último lustro, así como as que sufrisen dous incendios ou máis superiores ás 200 hectáreas nos últimos 10 anos.
En concreto, hai 16 parroquias que saen da listaxe en 2025: Ribasieira, no municipio de Porto do Son; Meiraos, en Folgoso do Courel; Castro de Escuadro, en Maceda; Padrenda, en municipio homónimo; Casaio, en Carballeda de Valdeorras; Queixa, en Chandrexa de Queixa; Cernado, en Manzaneda; A Xironda, en Cualedro; Camba, en Laza; Chaguazoso, na Mezquita; Bousés, en Oímbra; Grixoa, en Viana do Bolo; Sabuguido, en Vilariño de Conso; Vilamaior da Boullosa, en Baltar; Saiar, en Caldas de Reis; así como Poio, en concello homónimo. En cambio, entran nesta lista as parroquias: Requeixo, en Chandrexa de Queixa, e Pontellas, no Porriño. Paralelamente, a Consellería de Medio Rural ten previsto levar a cabo durante 2025 un total de 250 queimas preventivas nunha superficie de 1.437 hectáreas, a maior cifra histórica desde a posta en marcha desta medida para evitar incendios forestais.
