Rueda sobre a convocatoria da Conferencia de Presidentes: "É un intento errado de desviar a atención dos Whatsapps de Sánchez"
Reclama "menos nervios e máis explicacións", e cre oportuno que o PP ofreza co seu Congreso unha alternativa ao Goberno en "descomposición".
Por Europa Press / Redacción | BILBAO | 15/05/2025 | Actualizada ás 14:05
O presidente da Xunta de Galicia, Alfonso Rueda, afirmou este xoves en Bilbao que a Conferencia de Presidentes convocada por Pedro Sánchez para o 6 de xuño supón un "intento errado" de desviar a atención dos Whatsapps que mantivo co exministro de Transportes e exsecretario de Organización do PSOE, José Luís Ábalos, e que están a ser revelados. Ademais, reclamoulle "menos nervios e máis explicacións", e defendeu a oportunidade da celebración do Congreso dos populares para ofrecer unha alternativa ao Goberno en "descomposición".
Rueda, xunto coa tenente de alcalde do Concello de Bilbao Amaia Arregi, inaugurou un fito quilométrico da Ruta Xacobea ao seu paso por capital biscaíña, no lateral da Basílica de Begoña. En declaracións aos medios de comunicación, o presidente da Xunta de Galicia considerou "moi reveladores" os Whatsapps do presidente do Goberno con Ábalos. Ademais, destacou "o nerviosismo evidente, case indisimulado", de Pedro Sánchez na sesión de control de onte no Congreso pola revelación destas mensaxes.
Ao seu xuízo, "isto non é un caso de máis nin de menos", e o feito de que queira "quitarlle importancia" e diga que "non se pode tolerar", cando "noutras épocas acirraban, é moi revelador de que evidentemente tranquilos non están". Alfonso Rueda pediu que se ofrezan explicacións "xa" e dixo que hai que "pór negro sobre branco algunhas situacións que sempre se negaron desde o Goberno e o PSOE, e que agora parece que se fan moi evidentes". "Por tanto menos nervios e máis explicacións", remarcou.
Tamén se referiu ao Congreso que o PP celebrará os días 5 e 6 de xuño para defender que "é un bo momento" para facelo e cre que, cando "ninguén pon en dúbida o liderado" de Alberto Núñez Feijóo, hai que "ofrecer aos españois unha alternativa fronte á evidente descomposición do Goberno do PSOE". "Creo que chega o momento máis oportuno. Eu espero que o PP de Galicia, que é a comunidade autónoma con máis afiliados de toda España, teña o papel importante que sempre tivo nese Congreso e no funcionamento do partido", apuntou.
CONFERENCIA DE PRESIDENTES
Rueda, que lamentou que se coñeceu a convocatoria da Conferencia de Presidentes polos medios de comunicación, sen que houbese antes unha reunión preparatoria, cre que é un intento "errado" de Pedro Sánchez de desviar a atención" nun momento no "todo o mundo fala" dos seus Whatsapps. "Algo tan importante e que debe estar tan institucionalizado e tan coordinado como a Conferencia de Presidentes, improvísase, e non hai máis que ver os temas que se expoñen. A vivenda é importante, a educación é importante, pero hai outros temas importantísimos tamén. O financiamento está aí e seguímolo pedindo, non só comunidades do PP, tamén do PSOE", lembrou.
O presidente da Xunta criticou que "volve eludirse ese tema" e que tampouco se vaia falar "incriblemente do apagamento" do pasado 28 de abril "coas consecuencias que tivo", sen que houbese explicacións. "Polas razóns polas que se convoca, e polo contido incompleto, é outra oportunidade perdida, e outro intento máis do presidente do Goberno de instrumentalizar ao seu favor e de modo partidista, algo que debía ser moi institucional e que tiña que ter unha utilidade para que as comunidades autónomas dialoguen e cheguen a acordos co Goberno da nación, da nosa nación tamén", manifestou.
