Simulan un gran incendio en Ourense para coordinar a centos de efectivos na loita contra os lumes
360 militares e máis de 100 vehículos da UME participarán no operativo.
Por Europa Press / Redacción | OURENSE | 23/05/2025 | Actualizada ás 11:44
O Quinto Batallón de Intervención en Emerxencias (BIEM V), da Unidade Militar de Emerxencias (UME), realizará, entre o 26 e o 30 de maio, un exercicio de instrución e adestramento en loita contra incendios forestais na provincia de Ourense.
Estas prácticas están dirixidas a adestrar ao persoal no manexo de ferramentas manuais e mecánicas para roza e o movemento por pistas forestais con autobombas, ademais de traballos en interface urbano forestal. Estes exercicios realizaranse en zonas forestais dos municipios da Rua, Barco de Valdeorras, Manzaneda e Pobra de Trives.
Dentro das actividades programadas está previsto realizar un exercicio de colaboración coa Dirección Xeral de Defensa do Monte, da Xunta de Galicia, cunha simulación dun incendio forestal no que participarán os efectivos conxuntamente, co obxectivo de integrar os diferentes dispositivos como nunha situación real.
O operativo do BIEM V estará composto por 360 militares e máis de 100 vehículos, entre os que se atopan: helicópteros, autobombas, ambulancias, estacións de transmisións e diversos vehículos pesados e lixeiros especializados.
