Por Galicia Confidencial | A Coruña | 25/05/2016 | Actualizada ás 11:34
Oito membros das xuntas directivas de Ciudadanos en Ames e A Coruña formalizaron as súas dimisións por discrepancias co partido en relación á elección do cabeza de lista por esta provincia para as eleccións xerais de xuño, tras a substitución de Antonio Rodríguez -- candidato nos comicios de decembro-- por José Canedo, segundo informa Europa Press.
Javier López, coordinador da agrupación de Ames, confirmou que, tras unha reunión celebrada coas bases do partido a última hora deste martes, os tres membros que conformaban a xunta directiva decidiron presentar a súa dimisión, aínda que se manteñen como afiliados.
A mesma decisión adoptaron cinco dos sete membros da xunta directiva da Coruña. En concreto, dimitiron Patricia Pertierra Castaño, coordinadora e voceiro; José Manuel Macho Gómez, secretario-tesoureiro; Víctor Pedreira Romar, responsable de comunicación; José María Pérez Fafián, responsable de política municipal; e Alejandro Almau Taboada, responsable de cidadanía e relacións con asociacións e entidades.
Primarias
Agora, o partido deberá designar unha xestora ou convocar eleccións á xunta directiva nestas agrupacións. No caso de Ames, Javier López, que é tamén concelleiro neste concello, indicou que presentan a dimisión por entender que o partido "dinamitou as primarias, que é o noso ADN".
Non obstante, aclara que a súa postura non é polo cambio de nomes no cabeza de lista e vincula a decisión polo feito de que non se respectase a decisión das primarias. Mentres, ratifica que seguirán como afiliados, aínda que non descarta a posible marcha dalgúns deles nesta agrupación polo malestar que, segundo apunta, existe.
Na Coruña, os cinco membros da xunta directiva que presentaron a súa dimisión criticaron, a través dun comunicado, a designación "a dedo" do cabeza de lista. Desta decisión, aseguran que "é contraria aos principios" de Ciudadanos como partido.
Críticas á dirección
"Non podemos en conciencia dar o mellor de nós mesmos en apoio desta candidatura nin pedir aos nosos afiliados e simpatizantes un esforzo na campaña ao que nós mesmos non estamos dispostos", engaden.
Por outra banda, denuncian sufrir "unha enorme cantidade de trabas" dende a organización territorial de Ciudadanos para o desempeño das súas funcións. "A recente destitución de noso responsable de redes sociais, Juan José Loureiro, e o secuestro do correo e a intranet da agrupación, impedíndonos a comunicación cos nosos propios afiliados, fan a situación totalmente insostible", engaden.
"Por todo isto, a única saída que nos permite conservar a lealdade ao partido, pero moi especialmente, aos principios que nos trouxeron a el é dimitir", recalcan. Con todo, din que seguen crendo en Ciudadanos "e no proxecto de rexeneración democrática que representa".
Por iso motivo, confirman que se manterán como afiliados. Mentres, dende a dirección do partido en Galicia non se quixeron pronunciar sobre a decisión adoptada por os ata agora membros destas xuntas directivas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.