Catálogo de riscos da corrupción elaborado por Contas en colaboración coa Fiscalía
Así o destacou o conselleiro maior de Contas, Juan Carlos Aladro, na comisión permanente non lexislativa para as relacións co Consello de Contas, que celebrou este venres o Parlamento.
Por Europa Press / Redacción | SANTIAGO DE COMPOSTELA | 30/05/2025 | Actualizada ás 14:55
O Consello de Contas prevé no seu plan de traballo para 2025 elaborar un catálogo específico de riscos da corrupción en colaboración coa Fiscalía de Galicia sobre a base de comportamentos que xa se producisen.
Así o destacou o conselleiro maior de Contas, Juan Carlos Aladro, na comisión permanente non lexislativa para as relacións co Consello de Contas, que celebrou este venres o Parlamento.
Entre outros traballos previstos, Aladro referiuse ao que fará Contas por recomendación do Parlamento, relativo á fiscalización da Federación Galega de Kickboxing.
A oposición na Cámara, BNG e PSdeG, criticaron tanto o día en que se convocou e desenvolvido esta comisión --venres posterior ao festivo da Ascensión en Santiago-- como o debate acumulado de varios informes, xa que, con anterioridade ao momento sobre o plan de traballo, o conselleiro maior compareceu para presentar a memoria de 2023 que contén varios documentos de fiscalización e para presentar outro sobre as contabilidades electorais correspondentes aos comicios de febreiro de 2024.
"A este paso, en 2027 ou noutra lexislatura", ironizou a deputada do Bloque Noe Presas nun momento do debate, en referencia ao informe sobre saúde mental que realizou Contas, e que este venres non foi obxecto de presentación por parte do conselleiro maior.
Presas lamentou o "volume inaudito" de informes acumulados e considerou que "non é habitual nin democrático" dar o debate nos tempos establecidos.
Por parte do PSOE galego, Elena Espinosa informou do rexistro, leste mesmo venres, dunha proposta de modificación das normas de funcionamento de etsa comisión, "para que cumpra co seu labor". Unha proposta que cualificou de "sensata" e mostrouse "optimista" con respecto a que o cambio se produza "pronto".
"AO DÍA CON TODOS OS INFORMES PENDENTES"
En fronte, Cristina Sanz (PPdeG) rexeitou estas "acusacións graves" e replicou que "coa celebración desta comisión" prodúcese unha posta "ao día" no debate de "todos os informes pendentes".
A través dun comunicado de prensa, os socialistas concretaron que a súa proposta expón aumentar as comparecencias do Consello de Contas, a rendición de contas e a transparencia no Parlamento, co ánimo de "impedir" o debate acumulado de informes "nunha única sesión anual, como está a impor agora o PP".
A nacionalista Noa Presas tamén chanceou sobre "cousas que fai moi ben o PP como os momentos" que escolle para convocar esta comisión ou dar a coñecer informes elaborados por Contas.
Na súa intervención, o conselleiro maior presentou os principais resultados de varios informes de fiscalización, ao que Presas respondeu con críticas aos "chanchullos" que ve en "mil e unhas cuestións" que cada ano lembra Contas como o uso de contratos sen concorrencia competitiva ou menores, "legal, pero non transparente".
Tamén advertiu de datos dos que a formación frontista extrae unha "tendencia á privatización da sanidade", ao que a popular Cristina Sanz replicou con outros números cos que reivindicou o investimento en sanidade pública.
Así mesmo, Sanz contrapuxo a situación que se dá co Consello de Contas en Galicia co organismo fiscalizador a nivel nacional, o cal aproveitou para cargar contra a xestión do presidente socialista Pedro Sánchez.
Co Goberno bipartito en Galicia (2005-200) a comisión do Consello de Contas convocouse "cinco veces", segundo dixo a portavoz no debate do grupo maioritario, ao que Espinosa respondeu con que os populares están "traumatizados" co que fixo aquel executivo (de PSdeG e BNG).
