‘Viquingos. Unha ollada desde Galicia’, unha viaxe ao pasado dende o Museo do Mar

O Museo do Mar de Galicia acollerá desde o 9 de xuño a exposición ‘Viquingos. Unha ollada desde Galicia’, unha mostra que explora a pegada dos pobos nórdicos na cultura galega. A exposición, promovida pola Xunta de Galicia, poderá visitarse en Vigo entre o 10 de xuño e o 28 de setembro, como parte do compromiso da Consellería de Cultura de levar as mostras do Gaiás a diferentes puntos da comunidade. O proxecto é unha continuidade de ‘Unha vida viquinga’, exhibida no Museo Centro Gaiás no segundo semestre de 2024, que atraeu a máis de 60.000 visitantes.

A mostra reúne pezas procedentes de once museos e institucións, entre eles nove galegos, un sueco e un andaluz. Entre os fondos destacan obxectos do Museo das Peregrinacións e de Santiago, o Museo Provincial de Pontevedra ou o Museo Arqueolóxico de Ourense, así como do Gotlands Museum (Suecia), que achega medio cento de pezas que ilustran a vida cotiá, os oficios e as tradicións dos pobos escandinavos durante a Era Viquinga (séculos IX-XII). A exposición inclúe ferramentas, xoias, puntas de lanza, peites ou limpadores de oídos, elementos que axudan a romper cos estereotipos que reducen os viquingos a simples guerreiros conquistadores.

Ademais, o público poderá coñecer obxectos vinculados directamente coa presenza viquinga en Galicia, como a pedra fundacional das Torres do Oeste ou o báculo do bispo Gonzalo, protagonista dunha lenda sobre a defensa milagrosa da costa galega fronte a unha frota viquinga. Moedas, colares e restos arquitectónicos completan o percorrido, que se articula arredor das etapas da vida: nacemento, infancia, madurez e morte, ofrecendo unha visión global tanto da sociedade escandinava como da galega medieval.