Os ocupados superan o millón en Galicia

Estes datos anticipan unha suba progresiva dos afiliados á Seguridade Social neste mes de maio. En comparación co mesmo mes do ano anterior, a cifra de afiliacións na comunidade galega incrementouse un 1,63%, cun total de 17.514 ocupados máis.

Por réximes, os 1.094.806 cotizantes galegos distribúense entre o xeneral (872.189), autónomos (204.677) e o sector do mar (17.940). Á súa vez o réxime xeral repártese entre o subtipo xeral (844.289), o agrario (6.121) e o fogar (21.779).

No conxunto estatal, a Seguridade Social gañou unha media de 195.736 cotizantes en maio respecto ao mes anterior (+0,9%), grazas, entre outros factores, ao impulso da hostalaría, que sumou máis de 76.000 novos afiliados no mes. No último ano, de maio de 2024 a maio de 2025, a Seguridade Social estatal gañou 463.581 afiliados en valores medios, cun crecemento interanual do 2,2%. O Ministerio subliñou que, sumando os incrementos de cotizantes de abril e maio (+426.729 ocupados), o crecemento actual é maior ao do mesmo período de 2024 (+419.828 ocupados).

MÁXIMO HISTÓRICO DE MULLERES TRABALLANDO

A afiliación media creceu en maio en ambos os sexos, aínda que máis entre os homes, que sumaron 106.262 ocupados no mes (+0,9%), ata os 11.456.360 cotizantes. A afiliación feminina, pola súa banda, creceu en 89.474 ocupadas, ata marcar unha nova marca histórica de 10.328.015 cotizantes, cifra que representa o 47,4% do total de afiliados.

"Hoxe traballan en España máis mulleres ca nunca e a brecha salarial de xénero reduciuse cinco puntos desde 2018. O balance do noso Goberno en termos de máis e mellor emprego é moi satisfactorio e imos seguir traballando para superalo", asegurou a ministra Saiz.

HOSTALARÍA, O SECTOR QUE MÁIS EMPREGO CREOU EN MAIO

Dentro do Réxime Xeral, a hostalaría protagonizou o maior incremento na ocupación ao gañar 76.120 cotizantes respecto ao mes anterior (+4,9%), seguido, de lonxe, polas actividades administrativas, con 22.021 afiliados máis (+1,5%), e do comercio, que sumou 9.346 ocupados (+0,3%).

O Ministerio puxo o acento na intensidade coa que gañaron ocupados no último ano os sectores de transporte e almacenamento (+6,8%); actividades artísticas, recreativas e de entretemento (+4,9%); agricultura, gandaría, caza, silvicultura e pesca (+4,6%); e actividades científicas e técnicas (+3,8%).

SINDICATOS

A CIG alerta dun aumento da precariedade en Galicia por "o uso e abuso" da contratación temporal ao crecer un 30% en maio en comparación con abril, ademais de supor máis do 70% do total de contratos. Igualmente, advirte de que os contratos fixos descontinuos alcanzaron o 31,8%. O sindicato nacionalista apunta a "un crecemento do emprego estacional, precario e de baixa calidade" que identifican coa "pobreza laboral". Unha cuestión que atribúe á alza da contratación estacional no sector da hostalaría, o 29% das novas afiliacións.

En cambio, UGT defende que "o éxito da reforma laboral é incuestionable", aínda que recoñece que "é necesario" abordar "desequilibrios": o desemprego de longa duración, baixos salarios e reforma do despedimento. Tamén sinalan un "forte predominio da modalidade indefinida grazas á reforma laboral", pois "se constata un incremento do número de afiliados á Seguridade Social e unha baixada do desemprego", ademais de que "a temporalidade segue en mínimos históricos". 

Mentres, Comisións Obreiras indica que o paro diminúe en Galicia máis que a media estatal, aínda que a creación do emprego segue por detrás cunha "menor capacidade" da economía galega para xerar postos de traballo.

Noutra orde de cousas, a Asociación Galega de Traballadores Autónomos e do Mar (Agtamar), integrada en UPTA, chamou a atención acerca de que o crecemento de afiliacións de autónomos en Galicia duplica ás cifras de maio de 2024, cun total que se eleva a 204.894.

SUMAR

O secretario xeral de Movemento Sumar Galicia, Paulo Carlos López, animou á Xunta a "darlle as grazas" á vicepresidenta segunda e ministra de Traballo, Yolanda Díaz, e ás súas reformas polo descenso do desemprego na Comunidade galega.

Nun comunicado remitido aos medios, Paulo Carlos López cualificou como "moi positivas" as declaracións do conselleiro de Emprego, Comercio e Emigración, José González, nas que puña en valor os datos de desemprego rexistrado e as afiliacións á Seguridade Social en Galicia no mes de maio.

Sumar destaca que en Galicia, a día de hoxe, hai 111.641 persoas desempregadas, o nivel de paro máis baixo de toda a serie histórica por segundo mes consecutivo. "Xa é un bo indicador que asuman como bos os datos que o Congreso dan como malos", sostivo.