Por que están en Galicia 23 das 29 praias de calidade “pobre”?
O vindeiro sábado 4 de xuño, coincidindo nesa fin de semana ca conmemoración Alternativa Galega de Esquerda en Europa organiza a xornada “A problemática da contaminación do medio mariño nas pescas e o marisqueo da UE”, que terá lugar en Ferrol. Nelas avaliarase o recente informe de Bruxelas que atopa serios problemas na calidade das augas do noso litoral.
Por Galicia Confidencial | Ferrol | 28/05/2016 | Actualizada ás 11:30
A eurodeputada de AGEe, Lídia Senra, explica que a xornada busca "poñer de relevo unha visión holística do medio mariño na que teñamos en conta non só a importancia da súa dimensión produtiva, senón tamén a correspondencia existente entre a propia calidade das augas e a nosa saúde, ou as claves do significado xeopolítico que cada vez máis están adquirindo os recursos hídricos a nivel global, sen perder de vista ademais o compoñente identitario que o mar, as rías, os ríos e mesmo os océanos teñen para o pobo galego ".
A eurodeoputada de AGEe é suplente para o Grupo da Esquerda Unitaria Europea-Esquerda Verde Nordica (GUE/NGL) na Comisión de Pesca do Parlamento Europeo, xa que "dende o inicio asumimos que loita a prol do noso medio mariño tiña que ser unha das principais estratexias de traballo de Alternativa Galega de Esquerda en Europa".
O encontro o vindeiro sábado 4 en Ferrol servirá para abordar oInforme anual sobre as aguas de baño realizado pola Axencia Europea de Medio Ambiente (AEMA) e a Comisión Europea e publicado esta mesma semana. A través deste estudo, que revela que das 29 praias con calidade "pobre" que hai no Estado 23 atópanse na Galiza. "A propia UE corrobora a preocupación expresada en múltiples ocasións polas organizacións sociais, pesqueiras e ecoloxistas en relación á calidade das nosas augas", salienta Lídia Senra.
O xefe da Estación de Bioloxía Mariña da Graña, Guillermo Díaz Agras, o presidente da Asociación de Armadores de Artes Menores de Galicia (ASOAR-ARMEGA), José Luís Rodríguez, o coordenador do Comité de Emerxencia da Ría de Ferrol e membro da Asociación Cultural Fuco Buxán, Manuel Rodríguez Carballeira; o presidente da Asociación polo Saneamento da Ría de Pontevedra, Andrés Ruano, o presidente da Plataforma en Defensa do Mar da Comarca Muros-Noia (Plademar), Estebo Ameneiro, o voceiro de Pesca por AGE no Paralmento Galego, Juan Manuel Fajardo e o Doutor en Xeoloxía e Impulsor do proxecto do Xeoparque do Cabo Ortegal, Francisco Canosa Martínez serán algún dos relatores galegos do encontro.
