Aumenta o número de usuarios dos aeroportos galegos, menos en Santiago

Todos os aeroportos galegos incrementaron o seu número de viaxeiros en maio, en comparación co mesmo mes de 2024, menos o aeródromo de Santiago, que perdeu un 25,1% de usuarios, ata situarse nas 302.990 persoas. A pesar disto, Lavacolla mantense como o principal aeroporto de Galicia, con 2.410 voos o mes pasado, un 18,8% menos. Pola súa banda, a terminal de carga do aeroporto moveu un total de 312 toneladas, un 29,3% menos que o mesmo maio de 2024.

Aena lembra nos datos presentados este xoves que durante o mes de maio de 2024, o Aeroporto de Vigo pechou 25 días, o que levou a Santiago a asumir viaxeiros e operacións de forma extraordinaria. Isto supuxo o aumento da estatística do ano pasado e fai caer a deste exercicio. Entre xaneiro e maio, o aeroporto de Santiago foi utilizado por máis de 1,2 millóns de persoas, un 14,3% menos, con 9.744 voos, un 8,1% menos, dos que 8.899 foron comerciais. Pola súa banda, a terminal de carga compostelá rexistrou 1.502 toneladas de mercadorías no cinco primeiros meses de 2025.

Precisamente o aeroporto de Vigo pechou maio con 94.559 pasaxeiros, moi por encima dos datos do ano pasado cando só estivo operativo seis días e moveu a uns 16.429 pasaxeiros. Un total de 1.136 voos operaron desde Peinador en maio e movéronse 23,7 toneladas de mercadorías. No que vai de ano, xa son 427.922 pasaxeiros os que optaron por voar desde Vigo, un 20,4% máis. Pola súa banda, na Coruña rexistráronse 111.614 viaxeiros en maio, un 4,5% máis que en 2024, con 1.490 voos, un 16,2% máis. A terminal de carga moveu preto de 2 toneladas o mes pasado.

Imaxe do aeroporto de Lavacolla. | Fonte: Europa Press