A Xunta destaca en Castrelo de Miño a aposta do festival Espírito do Ribeiro pola artesanía galega

Castrelo de Miño acolle esta fin de semana a quinta edición do festival Espírito do Ribeiro, unha cita que combina música, produto de proximidade, gastronomía e viño coa promoción da artesanía galega. O conselleiro de Emprego, Comercio e Emigración, José González, desprazouse este sábado ata a localidade para apoiar esta iniciativa, que cualificou como "un exemplo da colaboración entre Administracións para difundir elementos patrimoniais como a Artesanía de Galicia".

Como principal novidade, o festival adopta desde este ano un formato rotatorio entre tres concellos do Ribeiro. Así, Castrelo de Miño é o primeiro anfitrión desta nova etapa; en 2026 celebrarase en Cenlle e en 2027 en Arnoia, coa intención de implicar de forma directa ao territorio e descentralizar a actividade cultural e promocional.

A organización do evento contou coa participación activa da Xunta de Galicia, que apoia a presenza de profesionais do sector artesanal a través da Fundación Artesanía de Galicia. Segundo informou o Goberno galego, seis marcas vinculadas a este selo participan como expositores nesta edición. Entre elas figuran cinco propostas procedentes da provincia de Ourense —María Á, Galifornia Dreaming, Pilarnia Arte, Luciérnaga e Bangus— e unha máis de Vigo, Peixesapop.

O Espírito do Ribeiro non só centra a súa atención na artesanía, senón que busca poñer en valor o viño da Denominación de Orixe Ribeiro e os produtos alimentarios que contan co distintivo Artesanía Alimentaria, un selo impulsado tamén pola Xunta. A experiencia complétase cun programa cultural pensado para todos os públicos, que mestura concertos, actividades infantís e espazos de mercado onde os visitantes poden coñecer de preto os procesos creativos dos artesáns e degustar os produtos da zona.

Desde a Xunta destacaron que este tipo de festivais contribúen a dinamizar o medio rural, xerar economía local e promover o patrimonio inmaterial de Galicia. Ao tempo, subliñaron que a integración de diferentes disciplinas creativas e sectores produtivos representa unha aposta pola identidade cultural e territorial da comarca do Ribeiro.