O incendio da Cañiza teríase iniciado en 5 focos simultáneos, o que apunta á súa intencionalidade

O incendio forestal que desde este mércores afecta o municipio pontevedrés da Cañiza, parroquia do Couto, calcina xa unhas 270 hectáreas, segundo informou a Consellería do Medio Rural, que sinalou tamén que se iniciou ata en cinco puntos diferentes de forma case simultánea, polo que "apunta a unha clara intencionalidade". Con motivo deste incendio foi necesario activar a situación 2 de emerxencia pola proximidade do lume ao núcleo de Nogueiró e a Dirección Xeral de Emerxencias emitiu unha mensaxe 'É-Alert' para confinar á poboación de sete núcleos, un confinamento que foi levantado á primeira hora deste xoves.

O lume iniciouse ás 16.23 horas deste mércores e para a súa extinción mobilizáronse 18 axentes, 31 brigadas, 20 motobombas, seis pas, oito técnicos, seis unidades técnicas de apoio, sete avións e 10 helicópteros. Ademais, incorporáronse 96 militares e 38 medios efectivos da Unidade Militar de Emerxencias (UME). Segundo informou o Goberno, os equipos desprazados realizaron traballos de liquidación e refresco do perímetro entre os núcleos de Nogueiró e Curuxeiras, así como do recoñecemento do perímetro con drons.

ESTABILIZADOS: ARBO E CARBALLEDA DE AVIA

Así mesmo, a Consellería do Medio Rural deu por estabilizado ás 12.15 horas o lume que permanecía activo desde o martes na localidade pontevedresa de Arbo e que afectou a ao redor de oito hectáreas. Cómpre lembrar que neste lume tamén foi necesario decretar a situación 2 de emerxencia pola súa proximidade a núcleos de poboación, unha situación operativa que foi desactivada ás 23.55 horas dese mesmo martes. Polo momento mobilizáronse para a súa extinción un técnico, oito axentes, 20 brigadas, 13 motobombas e dous helicópteros.

Tamén permanece estabilizado, desde as 21.54 horas do mércores, o lume do municipio ourensán de Carballeda de Avia, que segundo as últimas estimacións rolda as 20 hectáreas calcinadas e no que, antes desta nova estabilización, rexistrouse unha reprodución debido á complexidade das condicións meteorolóxicas. Neste caso, o departamento autonómico desprazou á zona cinco técnicos, 27 axentes, 44 brigadas, 25 motobombas, tres pas, un tractor, catro helicópteros e oito avións.

CONTROLADOS: CARBALLEDO, SALVATERRA E TOMIÑO

Ademais, a Consellería notificou que segue controlado o incendio forestal orixinado ás 21.15 horas do mércores no municipio lucense de Carballedo, na parroquia de San Mamede de Lousada. O lume afecta a unha superficie dunhas 16 hectáreas e nel traballaron un total dun técnico, 14 axentes, 23 brigadas, 27 motobombas, tres pas, tres helicópteros e tres avións. Tamén permanece controlado o incendio do concello pontevedrés de Salvaterra de Miño que se iniciou na parroquia de Pesqueiras o luns e que afecta a unhas 47 hectáreas. Ata alí desprazáronse catro técnicos, 16 axentes, 28 brigadas, 21 motobombas, catro pas, unha unidade técnica de apoio, oito helicópteros e nove avións.

Doutra banda, durante a xornada deste xoves a Consellería informou dun incendio forestal no municipio pontevedrés de Tomiño, que xa está controlado desde as 22.20 horas do mércores e que segundo as últimas estimacións provisionais afecta a unha superficie de 27 hectáreas. Da superficie calcinada, 25 hectáreas son de monte con árbores e as dúas restantes de monte raso. Para a súa extinción, mobilizáronse dous técnicos, 14 axentes, 14 brigadas, 11 motobombas, unha pa e un helicóptero.

Por outra banda, xa quedou extinguido ás 19.07 de onte un incendio forestal na parroquia de Cela, en Bueu. Afectou a unha superficie de 0,3 hectáreas de arboledo e 0,17 de superficie rasa. A Xunta lembra que está a disposición da cidadanía o número de teléfono gratuíto 085, ao que deben chamar en caso de detectar algún incendio forestal. Existe tamén un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085.

PRIMEIRA VEZ QUE SE EMPREGA O SISTEMA "ES-ALERT"

O sistema 'Es-Alert', implementatado pola Xunta para enviar alertas de emerxencia a través do 112 Galicia aos teléfonos móbiles situados na zona afectada por unha emerxencia, foi utilizado por primeira vez en situación real na comunidade ante o confinamento de varios núcleos da Cañiza. As altas temperaturas e o vento do nordés afectan a Galicia e han recrudecido os lumes nas últimas xornadas, sendo ata agora o da Cañiza o municipio máis afectado no que se refire a superficie queimada. De feito, a localidade rexistrou dous incendios case en paralelo e un deles complicouse.

O seu alcalde, Luís Piña, aseguraba que houbo desaloxo de veciños, fontes do Goberno galego consultadas por Europa Press ratificaron que o que se mantén é a 'Situación 2' como medida preventiva por proximidade das chamas ás casas. Unha conxuntura na que se determinou confinar varios núcleos. Así, o 112 Galicia informou de que se activou o 'Es-Alert' e que o aviso foi emitido en modo preventivo pola proximidade do lume aos núcleos de poboación. "Se recibiches a alerta: mantén a calma, le o texto e segue as instrucións co fin de garantir a túa seguridade", transmitiu.

O conselleiro de Presidencia, Xustiza e Deportes, Diego Calvo, fixo unha valoración "moi positiva" do primeiro uso nunha situación real en Galicia deste sistema de alerta. Xustifica o seu uso polo feito de que a pasada noite "había moitísimo fume" na zona e para evitar desprazamentos en coche que entrañaban perigo pola falta de visibilidade. Ata a data só se empregou a alerta en simulacros. "O fume enchíao todo", relata. Esta mañá enviouse outra mensaxe á poboación de que xa non había perigo por saír de casa. "Creo que é un sistema que funciona ben", resume Diego Calvo. Con todo, pide á poboación que verifique que ten nos seus teléfonos activada a posibilidade de recibir estes avisos, xa que en "aínda hai persoas que teñen desconectada a posibilidade de recibir" este anuncio. Apunta que "é importante", "aínda que asusta o ruído que fai".

O BNG ACHACA OS LUMES Á "POLÍTICA DE ABANDONO DO RURAL"

A deputada e portavoz de Montes e Industrias Forestais do BNG no Parlamento, Montse Valcárcel, achacou os incendios dos últimos días rexistrados especialmente na provincia de Pontevedra á "política de abandono do rural" da Xunta, cunha xestión forestal e un ordenamento do territorio que, na súa opinión, "non son máis que unha entelequia e unha operación de mercadotecnia" no que se refire a a loita contra o lume. Neste contexto, a parlamentaria nacionalista lanzou primeiro unha mensaxe de solidariedade coas poboacións afectadas e puxo en valor o traballo do persoal do servizo de prevención de incendios.

Así, defendeu que a "clave da loita contra os incendios forestais é a anticipación pola vía da xestión do territorio rural cunha actividade agrícola, gandeira e forestal sustentable e respectuosa co medio ambiente". Neste sentido, considerou que unha das principais razóns polas que se producen estes incendios é "polo despoboamento e o abandono do rural e das propiedades forestais, unha realidade tanxible e preocupante".

"Nun rural abandonado, cun envellecemento da poboación e sen continuidade das explotacións agrogandeiras, xunto cunha escasa valoración do monte e a desaparición de árbores autóctonas caducifolio temos o caldo de cultivo para o lume", afirmou. Nesta liña, a deputada do Bloque pediu reducir ao máximo a incidencia dos incendios provocados intencionadamente ou por neglixencia nos que, engadiu, "a causa é unha inaxeitada xestión forestal". Por iso, esixiu á Consellería do Medio Rural que pase dun modelo que "dá prioridade aos investimentos en dispositivos de extinción, que ignora os efectos do quecemento global e a acumulación de biomasa" a outro no que se aposte por "promover paisaxes rurais vivos, rendibles, pero moito menos inflamables".

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Galicia Confidencial (@galicia_confidencial)