Detidas dúas persoas por causar oito incendios forestais na Costa da Morte tras queimar cables para extraer o seu cobre
Estes lumes puñan en perigo a poboacións de Camariñas, Cee, Dumbría, Vimianzo e Zas.
Por Europa Press / Redacción | A CORUÑA | 14/08/2025 | Actualizada ás 17:54
Dúas persoas foron detidas como presuntas autoras de oito delitos de incendios forestais na Costa da Morte. Segundo informa a Garda Civil, os incendios eran provocados ao queimar cables de cobre para extraer o metal e vendelo de maneira ilícita. Os arrestados son veciños de Olveiroa e a ambos se lles considera autores de iniciar os lumes ao queimar cable de cobre roubado para extraer o metal e vendelo no mercado ilícito. "O que acabou ocasionando múltiples incendios forestais que provocaron danos por valor de 20.000 euros".
A investigación iniciouse a finais de xuño tras coñecer a alta frecuencia de incendios forestais cun patrón semellante. Estes lumes puñan en perigo a poboacións de Camariñas, Cee, Dumbría, Vimianzo e Zas. O modus operandi dos detidos consistía en obter cable de cobre do tendido telefónico. Unha vez logrado, liberaban o plástico que o recubre. Para iso queimaban todo en lugares apartados, normalmente rodeados de árbores que lles impedise ser vistos por testemuñas.
Utilizaban acelerantes como a gasolina ou un soplete conectado a unha bombona de butano. Estas accións acababan producindo incendios ao abandonar a zona deixando o lume sen atención. Esta conduta, levada a cabo en pleno verán e preto de vexetación moi inflamable, provocou o inicio de oito incendios forestais. Os informes periciais confirmaron que todos eles tiñan un patrón de conduta semellante.
A investigación foi levada a cabo polo Equipo ROCA e o Equipo de Protección da Natureza da Garda Civil. Tras a súa detención, os individuos foron postos a disposición do Xulgado de Instrución número 2 de Corcubión. A Garda Civil mantén aberta a investigación para determinar se os detidos están implicados noutros feitos semellantes.
