Resignación nas estacións galegas ante a suspensión de trens a Madrid polos lumes: "Creo que imos estar aquí días"

A resignación apoderouse de decenas de persoas que se amontoan nas estacións de tren galegas ante a suspensión do servizo ferroviario durante esta xornada debido aos incendios que afectan a boa parte da provincia de Ourense: "Imos estar aquí días". E é que, tal como informou o propio ministro de Transportes e Mobilidade Sustentable, Óscar Puente, a reactivación dos lumes impide garantir o servizo habitual. Por iso, pediu aos cidadáns que non acudan ás estacións e sigan a información de Renfe nas súas canles oficiais.

Con todo, decenas de persoas agardan pacientes nas estacións galegas desde esta mañá. É o caso da de Vigo, onde viaxeiros agardan información para coñecer se poderán partir nas próximas horas. Traballadores de Renfe e de Adif alertáronlles de que onte non puido saír practicamente ningún tren con destino Madrid, mentres que este xoves partiu un pouco despois das 10.00 horas, que a esta hora aínda continúa parado en Ourense. Ademais, advertiron de que o martes si se estableceu un servizo de autobús para os afectados, pero o mércores xa non se organizou, polo que este xoves é probable que tampouco, debido a que a autovía tamén sofre cortes polo lume.

Por todo iso, parte dos usuarios decidiron marchar ás súas casas e devolver os billetes. Non é o caso dos turistas que visitaron Galicia e regresaban ao seu lugar de procedencia. "Levamos aquí desde as 13.00 horas. Agardamos a ver se podemos saír, pero creo que imos estar aquí días", apunta unha parella de anciáns que veu pasar uns días a Galicia. Peor situación a que viviu un grupo de peregrinos, que viron como o martes lles suspenderon o tren a Madrid de regreso desde Santiago e atrasáronllo dous días, decidindo eles vir coñecer Vigo. Agora, tamén se suspendeu o novo billete.

A pesar de que algúns deles solicitaron buses para regresar a casa, por agora Renfe non os estableceu. "Renfe ten as súas cousas", apuntaron, aínda que amosándose comprensivos pola situación que vive Galicia. No que si hai consenso é en esperar a que todo se solucione para montarse nun tren, xa que ningún quere quedar parado dentro dun vagón. Non entanto, a maioría dos viaxeiros considera que a situación pode alongarse durante varios días. "A cousa vai a peor", aseguran. Por iso, algúns comezaron a organizarse de cinco en cinco persoas para alugar coches e poder chegar aos seus destinos aínda que sexa por estradas secundarias.

RENFE INFORMA DE QUE QUEDAN CANCELADOS TODOS OS TRENS A MADRID

A medio tarde deste xoves, Renfe informou de que queda cancelada de forma definitiva para todo este xoves, 14 de agosto, a circulación de trens entre Galicia e Madrid debido á vaga de lumes. Nun aviso ás 18.00 horas en redes sociais, Renfe indica que quedan "suspendidas todas as circulacións entre Madrid-Zamora-Ourense para a xornada de hoxe debido á evolución dos incendios que afectan a este traxecto". Renfe lembra que mantén habilitados os cambios e anulacións sen custo para todos os traxectos entre Madrid, Ourense e Zamora debido aos cortes.